ঠাণ্ডাৰ দিনত তিল পিঠা আৰু তিল কিয় খাব লাগে?(তিল পিঠা – অসমীয়াৰ পৰম্পৰাগত খাদ্য আৰু তিল খোৱাৰ স্বাস্থ্য উপকাৰীতা)
(লেখিকা আৰু সম্পাদক: অনুৰাধা দাস)
শীতৰ ঋতুত ক্ৰমান্বয়ে ঠাণ্ডা বাঢ়ি যায় আৰু শৰীৰত অতিৰিক্ত শক্তি, উষ্ণতা আৰু পুষ্টিৰ প্ৰয়োজন হয়। ভাৰতৰ বহু ঠাইত এই সময়ত পৰম্পৰাগতভাৱে তিলৰ বিভিন্ন ব্যঞ্জন আৰু তিল ব্যৱহাৰ কৰা খাদ্য খোৱা দেখা হয়। অসমত তিল পিঠা এক জনপ্ৰিয় পৰম্পৰাগত খাদ্য, যি সুস্বাদু আৰু স্বাস্থ্যৰ বাবে অতি উপকাৰী। আয়ুৰ্বেদৰ মতে তিলৰ উষ্ণতা বৃদ্ধিৰ প্ৰভাৱ আছে বুলি ধৰা হয়, গতিকে ঠাণ্ডা ঋতুত ইয়াক সেৱন কৰিলে শৰীৰ ভিতৰৰ পৰা শক্তিশালী হয়।
◽তিল পিঠা অসমীয়া পৰম্পৰাগত খাদ্য কি?
বিশেষকৈ মাঘ বিহু আৰু শীতকালত অসমীয়া সংস্কৃতি আৰু উৎসৱৰ লগত জড়িত পৰম্পৰাগত খাদ্য হৈছে তিল পিঠা। চাউলৰ গুড়িৰ (পিঠাগুৰি) সৈতে, ভজা তিল আৰু গুড় (বা চেনি) ভৰাই তৈয়াৰ কৰা হয়।
ই কেৱল সুস্বাদু নহয়, শক্তিৰে সমৃদ্ধ, গতিকে শীত কালত ই শৰীৰক গৰম কৰি ৰখাত সহায় কৰে।
◽শীত কালত তিল আৰু তিলৰ পিঠা খোৱাৰ মূল কাৰণ
(১) শৰীৰ গৰম কৰি ৰখাত সহায় কৰে
তিল উষ্ণ প্ৰকৃতিৰ। ঠাণ্ডা আৰু শুকান জলবায়ুত তিল সেৱনে শৰীৰৰ উষ্ণতা বজাই ৰখাত সহায় কৰে আৰু ঠাণ্ডাৰ লগত জড়িত সমস্যা ৰোধ কৰে।
(২) শক্তি প্ৰদান কৰে
তিলত প্ৰচুৰ পৰিমাণে প্ৰটিন, স্বাস্থ্যকৰ চৰ্বি, কাৰ্বহাইড্ৰেট আদি থাকে। তিল পিঠা খালে তৎক্ষণাত শক্তি পোৱা যায় আৰু দুৰ্বলতা ৰোধ কৰে।
(৩) হাড় আৰু গাঁঠিৰ বাবে উপকাৰী
তিলত প্ৰচুৰ পৰিমাণে কেলচিয়াম, ফছফৰাছ, মেগনেছিয়াম থাকে, যিয়ে হাড় মজবুত কৰে। শীতকালত গাঁঠিৰ বিষ বৃদ্ধি হোৱাৰ প্ৰৱণতা থাকে, গতিকে তিল খোৱাটো অতি উপকাৰী।
(৪) পাচনতন্ত্ৰ শক্তিশালী কৰে
তিলত থকা আঁহে হজম শক্তি উন্নত কৰে আৰু কোষ্ঠকাঠিন্য দূৰ কৰে। শীত কালত পাচন শক্তি দুৰ্বল হৈ পৰে, গতিকে তিলৰ পিঠা পেটৰ বাবে উপকাৰী।
(৫) ছাল আৰু চুলিৰ বাবে উপকাৰী
তিলত ভিটামিন ই আৰু এন্টিঅক্সিডেন্ট থাকে, যিয়ে ছালখন শুকান হোৱাৰ পৰা ৰক্ষা কৰে আৰু চুলিক মজবুত কৰে। শীতকালত শুকান ছাল সাধাৰণতে দেখা যায়, এই সমস্যা দূৰ কৰিবলৈ তিল খোৱা হয়। চুলি আৰু ছালৰ সৌন্দৰ্য বৃদ্ধিৰ বাবে তিল প্ৰতিদিনে এচামুচকৈ খোৱা উচিত।
(৬) প্ৰতিৰোধ ক্ষমতা বৃদ্ধি কৰে
তিলত জিংক, আইৰণ, চেলেনিয়াম আদি খনিজ পদাৰ্থ থাকে, যিয়ে ৰোগ প্ৰতিৰোধ ক্ষমতা শক্তিশালী কৰে। ইয়াৰ ফলত চৰ্দি আৰু কাহ আৰু ঋতুভিত্তিক ৰোগ প্ৰতিৰোধ কৰাত সহায় কৰে।
◽তিল আৰু তিল পিঠা খোৱাৰ স্বাস্থ্য উপকাৰীতা
• হৃদযন্ত্ৰৰ স্বাস্থ্যৰ বাবে ভাল
তিলত পোৱা স্বাস্থ্যকৰ চৰ্বি আৰু এন্টিঅক্সিডেন্টে বেয়া কলেষ্টেৰল হ্ৰাস কৰাত সহায় কৰে, হৃদযন্ত্ৰ সুস্থ কৰি ৰাখে।
• ৰক্তহীনতা নিৰাময় কৰে
তিল আইৰণৰ উত্তম উৎস। ৰক্তহীনতা বা দুৰ্বলতাত আক্ৰান্ত লোকৰ বাবে তিল খোৱাটো উপকাৰী।
• মানসিক চাপ কমায়
তিলত থকা মেগনেছিয়াম আৰু ট্ৰিপ্ট’ফেনে মানসিক শান্তি প্ৰদান কৰাৰ লগতে মানসিক চাপ কমোৱাত সহায় কৰে।
• পুৰুষ আৰু মহিলা উভয়ৰে বাবে উপকাৰী
তিলে হৰম’নৰ ভাৰসাম্য ৰক্ষা কৰাত সহায় কৰে আৰু প্ৰজনন স্বাস্থ্যৰ উন্নতি সাধন কৰে।
◽তিল বা তিল পিঠা কোনে পৰিহাৰ কৰিব লাগে?
যদিও তিল অতি উপকাৰী, তথাপিও ইয়াৰ সেৱনে কিছুমান বিশেষ পৰিস্থিতিত ক্ষতিকাৰক হ’ব পাৰে।
(১) অত্যধিক পিত্ত প্ৰকৃতি থকা লোক
আয়ুৰ্বেদৰ মতে অতিমাত্ৰা পিত্ত ( গেছ - গেষ্ট্ৰিক ) থকা লোকসকলে তিল অতিৰিক্তভাৱে সেৱন কৰাটো পৰিহাৰ কৰিব লাগে। ইয়াৰ ফলত এচিডিটি, জ্বলা-পোৰা, পেটৰ আলচাৰ আদি হ’ব পাৰে।
(২) সঘনাই ডায়েৰিয়া বা পেটৰ বিষ হোৱা লোক
তিল গৰম, গতিকে ডায়েৰিয়া, ডিচেণ্ট্ৰি, বা পেটৰ বিষ হোৱা লোকে ইয়াৰ পৰা আঁতৰি থাকিব লাগে।
(৩) এলাৰ্জী থকা লোক
কিছুমান মানুহৰ তিল খালে এলাৰ্জী হয়। এনে লোকে তিল পিঠা বা তিলেৰে তৈয়াৰী খাদ্য খাব নালাগে।
(৪) অত্যধিক ওজন বা মেদবহুলতাত ভোগা লোক
তিলত কেলৰি আৰু চৰ্বিৰ পৰিমাণ বেছি। মেদবহুলতাত আক্ৰান্ত লোকসকলে সীমিত পৰিমাণে তিল সেৱন কৰিব লাগে।
(৫) অপাৰেচন বা গুৰুতৰ অসুস্থতাৰ পিছত
যদি আপুনি শেহতীয়াকৈ অস্ত্ৰোপচাৰ কৰিছে বা অন্য ৰোগত ভুগি আছে তেন্তে চিকিৎসকৰ পৰামৰ্শ নোলোৱাকৈ তিল সেৱন নকৰিব।
◽তিল কেনেকৈ সেৱন কৰিব?
• সদায় তিল ভজাৰ পিছত খাব লাগে।
• অত্যধিক নহয়, সীমিত পৰিমাণত তিল সেৱন কৰিব লাগে।
• ৰাতিপুৱা বা দিনত তিল খোৱাটো অধিক উপকাৰী।
• গুড়ৰ লগত তিল মিহলাই খালে স্বাস্থ্যৰ বাবে ভাল বুলি বিবেচিত হয়।
শীত কালত তিল পিঠা আৰু তিল সেৱন কৰিলে শৰীৰটো গৰম কৰি ৰখা, শক্তি বৃদ্ধি কৰা, ৰোগ প্ৰতিৰোধ কৰাত অতি সহায়ক হয়। ই অসমৰ পৰম্পৰাগত সংস্কৃতিৰ অংগ আৰু সম্পূৰ্ণ পুষ্টিকৰ খাদ্যও। অৱশ্যে আপোনাৰ শাৰীৰিক স্বভাৱ আৰু স্বাস্থ্যৰ অৱস্থাৰ প্ৰতি লক্ষ্য ৰাখিহে তিল সেৱন কৰিব লাগে। সঠিক পৰিমাণত আৰু সঠিকভাৱে সেৱন কৰিলে তিলৰ পিঠা শীতকালত স্বাস্থ্যৰ বাবে এক ডাঙৰ সংগী হ’ব পাৰে।
