সংখ্যা বিজ্ঞান অনুসৰি আপোনাৰ এই বছৰটিত কেনেকৈ সাৱধান হ'ব বা ভাগ্য নিৰ্ণয় কৰিব? জানিবলৈ পঢ়িব।
( অপূৰ্ব দাস )
সংখ্যা বিজ্ঞান বা নিউমাৰোলজী হৈছে এক অত্যন্ত প্ৰাচীন বিদ্যা যাৰ জৰিয়তে মানুহৰ জীৱনৰ অতীত, বৰ্তমান আৰু ভৱিষ্যতৰ বিষয়ে বিশদভাৱে জানিব পাৰি। ২০২৬ বৰ্ষটোৰ সংখ্যা বিজ্ঞানৰ দিশৰ পৰা এক সুকীয়া আৰু বিশেষ গুৰুত্ব আছে। যদি আমি ২০২৬ বৰ্ষৰ আটাইবোৰ সংখ্যা একেলগে যোগ কৰোঁ, তেন্তে আমি পাওঁ ২ যোগ ০ যোগ ২ যোগ ৬ সমান ১০। এই ১০ সংখ্যাটোক পুনৰ যোগ কৰিলে ১ যোগ ০ সমান ১ পোৱা যায়। অৰ্থাৎ, ২০২৬ বৰ্ষটোৰ বৰ্ষাংক হৈছে ১। সংখ্যা বিজ্ঞান অনুসৰি ১ সংখ্যাটো সূৰ্য দেৱতাৰ প্ৰতীক। সূৰ্য হৈছে সকলো গ্ৰহৰ ৰজা, যিয়ে নেতৃত্ব, নতুন আৰম্ভণি, অফুৰন্ত শক্তি, আত্মবিশ্বাস আৰু সফলতা বুজায়। এই প্ৰবল প্ৰভাৱৰ বাবে এই বছৰটো কিছুমান বিশেষ সংখ্যাৰ ব্যক্তিৰ বাবে অতি শক্তিশালী হ'ব, আনহাতে কিছুমানৰ বাবে ই প্ৰত্যাহ্বানমূলক বা দুৰ্বল হ'ব পাৰে।
◽ আপোনাৰ জীৱনত এই বৰ্ষটোৰ কেনে প্ৰভাৱ পৰিব সেয়া জানিবলৈ প্ৰথমে নিজৰ সংখ্যা কেনেকৈ উলিয়াব লাগে সেয়া জনাটো আৱশ্যক। নিজৰ মূলাংক উলিওৱাৰ নিয়ম অতি সহজ। আপোনাৰ জন্মৰ তাৰিখটো যোগ কৰি এই মূলাংক উলিওৱা হয়। উদাহৰণস্বৰূপে, যদি আপোনাৰ জন্ম কোনো মাহৰ ১৫ তাৰিখে হৈছে, তেন্তে আপোনাৰ মূলাংক হ'ব ১+৫= ৬। ঠিক সেইদৰে, যদি জন্ম তাৰিখ ২৩ হয়, তেন্তে ২+৩= ৫ হ'ব আপোনাৰ মূলাংক।
◽ মূলাংকৰ উপৰিও আপুনি নিজৰ ভাগ্যাংক উলিয়াব পাৰে যিয়ে জীৱনৰ দীৰ্ঘম্যাদী দিশবোৰ নিয়ন্ত্ৰণ কৰে। ভাগ্যাংক উলিওৱাৰ নিয়ম অনুসৰি আপোনাৰ জন্মৰ সম্পূৰ্ণ তাৰিখ, মাহ আৰু বছৰ একেলগে যোগ কৰিব লাগিব।
উদাহৰণস্বৰূপে, যদি কোনো ব্যক্তিৰ জন্ম তাৰিখ ১০ মে' ২০০১ চন হয়, তেন্তে ১+০+৫+২+০+০+১= ৯ হ'ব।
যদি আপোনাৰ জন্ম - ২০১৫ চনৰ জানুৱাৰী মাহৰ ১৫ তাৰিখে হয় তেন্তে হ'ব -
১৫/০১/২০১৫ ( ১+৫+০+১+২+০+১+৫= ১৫ হ'ব। এই ১৫ সংখ্যাটো আকৌ যোগ কৰিব লাগিব কাৰণ দুটা সংখ্যা আছে, যেনে ১+৫= ৬ , সংখ্যাটোক পুনৰ যোগ কৰিলে ৬ পোৱা যাব। এয়াই হ'ব ব্যক্তিগৰাকীৰ ভাগ্যাংক।
🟢 ২০২৬ বৰ্ষৰ শক্তিশালী সংখ্যাসমূহ
২০২৬ বৰ্ষৰ অধিপতি গ্ৰহ সূৰ্য হোৱাৰ বাবে যিবোৰ সংখ্যা সূৰ্যৰ সৈতে মিত্ৰভাবাপন্ন, সেইবোৰ সংখ্যা অত্যন্ত শক্তিশালী বুলি বিবেচিত হ'ব।
🟢 সংখ্যা ১: যিসকল ব্যক্তিৰ মূলাংক ১, তেওঁলোকৰ বাবে এই বছৰটো অতি উত্তম। যিহেতু বৰ্ষাংক আৰু মূলাংক দুয়োটা ১, সেয়েহে আপোনাৰ নেতৃত্ব বহন কৰা ক্ষমতা বৃদ্ধি পাব। নতুন ব্যৱসায় আৰম্ভ কৰা আৰু কৰ্মক্ষেত্ৰত পদোন্নতি পোৱাৰ পূৰ্ণ সম্ভাৱনা আছে।
🟢 সংখ্যা ২: ২ সংখ্যাটো চন্দ্ৰৰ প্ৰতীক আৰু সূৰ্যৰ সৈতে চন্দ্ৰৰ অতি সুন্দৰ সম্পৰ্ক আছে। এই বছৰ আপোনাৰ মানসিক শান্তি বৃদ্ধি পাব। পৰিয়ালৰ সৈতে সম্পৰ্ক মধুৰ হ'ব আৰু অংশীদাৰিত্বৰ কামত সফলতা লাভ কৰিব।
🟢 সংখ্যা ৩: ৩ হৈছে বৃহস্পতি গ্ৰহৰ প্ৰতীক। শিক্ষা, জ্ঞান আৰু আৰ্থিক দিশৰ ক্ষেত্ৰত এই বছৰটো আপোনাৰ বাবে অতি শুভ। নতুন কিবা শিকাৰ বাবে বা উচ্চ শিক্ষাৰ বাবে এইটো অতি সুন্দৰ সময়।
🟢 সংখ্যা ৫: ৫ হৈছে বুধ গ্ৰহৰ প্ৰতীক। ব্যৱসায়, যোগাযোগ আৰু যাত্ৰাৰ ক্ষেত্ৰত ৫ মূলাংকৰ লোকসকলে এই বছৰটোত যথেষ্ট সফলতা অৰ্জন কৰিব পাৰিব। আপোনাৰ বুদ্ধিমত্তাৰ জৰিয়তে সমাজত সুকীয়া স্থান বনাবলৈ সক্ষম হ'ব।
🟢 সংখ্যা ৯: ৯ হৈছে মঙ্গল গ্ৰহৰ প্ৰতীক। মঙ্গল আৰু সূৰ্যৰ মাজত থকা গভীৰ মিত্ৰতাৰ বাবে এই বছৰটো আপোনাৰ বাবে অপাৰ শক্তি আৰু সাহসেৰে ভৰা হ'ব। আপুনি যিকোনো কঠিন পৰিস্থিতি অতি সহজে অতিক্ৰম কৰিব পাৰিব।
🔴 ২০২৬ বৰ্ষৰ দুৰ্বল সংখ্যাসমূহ
যিবোৰ সংখ্যাৰ সূৰ্যৰ সৈতে শত্ৰুতা আছে, সেইবোৰ সংখ্যাৰ বাবে এই বছৰটো অলপ দুৰ্বল বা প্ৰত্যাহ্বানমূলক হ'ব পাৰে।
🔴 সংখ্যা ৮: ৮ হৈছে শনি গ্ৰহৰ প্ৰতীক। জ্যোতিষ অনুসৰি সূৰ্য আৰু শনিৰ মাজত তীব্ৰ শত্ৰুতা আছে। সেয়েহে ৮ মূলাংকৰ লোকসকলে এই বছৰ কামত পলম হোৱা, অযথা বাধা অহা বা স্বাস্থ্যৰ সমস্যাৰ সন্মুখীন হ'ব পাৰে। অত্যন্ত ধৈৰ্য্য ধৰিব লাগিব।
🔴 সংখ্যা ৪: ৪ হৈছে ৰাহুৰ প্ৰতীক। ৰাহু আৰু সূৰ্যৰ পাৰস্পৰিক বিৰোধৰ বাবে এই বছৰটোত আপুনি মানসিক বিভ্ৰান্তি বা সঠিক সিদ্ধান্ত লোৱাত অসুবিধা পাব পাৰে। হঠাতে কোনো আৰ্থিক সিদ্ধান্ত লোৱাৰ পৰা বিৰত থকাটো উচিত।
🔴 সংখ্যা ৭: ৭ হৈছে কেতুৰ প্ৰতীক। এই বছৰটো আপোনাৰ বাবে অলপ নিৰাশাজনক হ'ব পাৰে। আধ্যাত্মিক দিশত মন দিলে শান্তি পাব, কিন্তু ভৌতিক আৰু আৰ্থিক দিশত সাৱধান হোৱা প্ৰয়োজন।
🔴 সংখ্যা ৬: ৬ হৈছে শুক্ৰ গ্ৰহৰ প্ৰতীক। সূৰ্য আৰু শুক্ৰৰ সম্পৰ্ক বৰ ভাল নোহোৱাৰ বাবে পাৰিবাৰিক জীৱনত মতানৈক্য আহিব পাৰে। আপোনাৰ খৰচৰ মাত্ৰা অস্বাভাৱিকভাৱে বৃদ্ধি পোৱাৰো সম্ভাৱনা আছে।
◽ দুৰ্বলতা দূৰ কৰাৰ সহজ উপায়সমূহ
যিসকল লোকৰ মূলাংক দুৰ্বল বুলি পৰিগণিত হৈছে, তেওঁলোকে জীৱনত শুভ ফল পাবলৈ কিছুমান বিশেষ উপায় অৱলম্বন কৰিব পাৰে।
◽ প্ৰতিদিনে ৰাতিপুৱা সোনকালে শুই উঠি স্নান কৰি সূৰ্য দেৱতাক জল অৰ্পণ কৰক। এটা তামৰ পাত্ৰত পানী লৈ তাত ৰঙা সেন্দূৰ বা ৰঙা ফুল দি সূৰ্যক অৰ্ঘ্য দিলে সূৰ্যৰ দোষ খণ্ডন হয়।
◽ দেওবাৰৰ দিনটোত ৰঙা, কমলা বা হালধীয়া ৰঙৰ কাপোৰ পৰিধান কৰিবলৈ চেষ্টা কৰক। এই ৰংবোৰে সূৰ্যৰ শুভ শক্তিক আকৰ্ষণ কৰে। ক'লা কাপোৰ পিন্ধাৰ পৰা বিৰত থাকক।
◽ ঘৰৰ দেউতাক বা পিতৃস্থানীয় ব্যক্তিক সদায় সন্মান কৰক আৰু গুৰুত্বপূৰ্ণ কামৰ আগতে তেওঁলোকৰ আশীৰ্বাদ লওক। পিতৃৰ সেৱা কৰিলে সূৰ্য গ্ৰহ বলৱান হয়।
◽ ৮ মূলাংকৰ লোকসকলে শনিবাৰে দুখীয়া লোকক সহায় কৰক আৰু আঁহত গছৰ তলত সৰিয়হৰ তেলৰ চাকি জ্বলাওক। ইয়াৰ দ্বাৰা শনি আৰু সূৰ্যৰ সংঘাত দূৰ হয়।
◽ ৪ আৰু ৭ মূলাংকৰ লোকসকলে প্ৰতিদিনে ভগৱান শিৱৰ উপাসনা কৰিলে সুফল পাব। শিৱলিংগত জল অৰ্পণ কৰিলে ৰাহু আৰু কেতুৰ বেয়া প্ৰভাৱ হ্ৰাস পায়।
◽ ৬ মূলাংকৰ লোকসকলে শুক্ৰবাৰে বগা ৰঙৰ মিঠাই বা বগা বস্ত্ৰ দৰিদ্ৰ লোকক দান কৰিলে পাৰিবাৰিক শান্তি ঘূৰি আহিব।
◽ যিকোনো গুৰুত্বপূৰ্ণ কাম আৰম্ভ কৰাৰ আগতে অলপ গুৰ বা মিঠা বস্তু খাই ওলাই গ'লে যাত্ৰা শুভ হয়। গুৰ সূৰ্যৰ অতি প্ৰিয় বস্তু।
◽ প্ৰতিদিনে ৰাতিপুৱা গায়ত্ৰী মন্ত্ৰ বা আদিত্য হৃদয় স্তোত্ৰ পাঠ কৰাটো সকলোৰে বাবে এক উত্তম উপায়। ই মনত একাগ্ৰতা আনে আৰু বাধাবিঘিনি আঁতৰ কৰে।
