মাত্ৰ এটা টোপাল তেজেৰেই মানৱ শৰীৰৰ ১০ বিধ ভিন্ন ধৰণৰ ভয়ংকৰ কৰ্কট ৰোগৰ লক্ষণ একেবাৰে প্ৰাথমিক অৱস্থাতেই নিৰ্ভুলভাৱে ধৰা পেলাব পৰা যাব।
( অপূৰ্ব দাস )
বৰ্তমান সময়ত কৰ্কট ৰোগ ভাৰতৰ স্বাস্থ্য খণ্ডৰ বাবে এক অন্যতম ডাঙৰ প্ৰত্যাহ্বান হিচাপে দেখা দিছে। ভাৰতবৰ্ষৰ দৰে এখন বিশাল আৰু জনবহুল দেশত প্ৰতি বছৰে লাখ লাখ লোক কৰ্কট ৰোগত নতুনকৈ আক্ৰান্ত হয় আৰু বহু লোকে সঠিক সময়ত উন্নত চিকিৎসাৰ অভাৱত অকালতে প্ৰাণ হেৰুৱাবলগীয়া হয়। চিকিৎসা বিজ্ঞানৰ অভূতপূৰ্ব অগ্ৰগতিৰ পিছতো এই ভয়ংকৰ ৰোগৰ প্ৰাদুৰ্ভাৱ ক্ৰমান্বয়ে বৃদ্ধি পোৱা পৰিলক্ষিত হৈছে। ইয়াৰ অন্যতম প্ৰধান কাৰণ হৈছে ৰোগৰ প্ৰাথমিক অৱস্থাত সঠিক আৰু নিৰ্ভুল নিৰ্ণয়ৰ অভাৱ। আমাৰ সমাজত বেছিভাগ ক্ষেত্ৰতেই ৰোগীৰ শৰীৰত এই ৰোগৰ লক্ষণসমূহ স্পষ্টকৈ দেখা পোৱাৰ পিছতহে, অৰ্থাৎ ৰোগটোৱে অন্তিম পৰ্যায় পোৱাৰ সময়তহে ৰোগ নিৰ্ণয় হয়। ফলত পৰৱৰ্তী সময়ত ৰোগীক চিকিৎসা প্ৰদান কৰাটো অতি কঠিন হৈ পৰে। সেয়েহে এই পৰিস্থিতিৰ পৰিৱৰ্তন অনাটো সময়ৰ দাবী হৈ পৰিছে।
🟢 কৰ্কট ৰোগৰ পৰা পৰিত্ৰাণ পোৱাৰ একমাত্ৰ উপায় হৈছে অতি সোনকালে আৰু একেবাৰে প্ৰাথমিক অৱস্থাতেই এই ৰোগৰ স্থিতি শৰীৰত ধৰা পেলোৱা। প্ৰাথমিক অৱস্থাত কৰ্কট ৰোগ ধৰা পৰিলে উন্নত চিকিৎসাৰ জৰিয়তে ৰোগীক আৰোগ্য কৰিব পৰা যায়। কিন্তু বৰ্তমান প্ৰচলিত পৰম্পৰাগত ৰোগ নিৰ্ণয় পদ্ধতিসমূহ, যেনে বায়প্সি বা এম আৰ আই সাধাৰণতে অত্যন্ত ব্যয়বহুল হোৱাৰ লগতে কিছুমান ক্ষেত্ৰত যথেষ্ট কষ্টদায়ক আৰু দীৰ্ঘ সময়সাপেক্ষ। সেয়েহে সাধাৰণ ৰাইজে নিয়মীয়াকৈ এনে জটিল পৰীক্ষাসমূহ কৰোৱাৰ পৰা বিৰত থকা দেখা যায়। এনে পৰিস্থিতিত ৰক্ত পৰীক্ষাৰ জৰিয়তে কৰ্কট ৰোগ নিৰ্ণয় কৰিব পৰা প্ৰযুক্তিৰ আৱশ্যকতা অতিশয় গুৰুত্বপূৰ্ণ হৈ পৰিছিল।
🟢 এই জটিল আৰু ভয়ংকৰ সমস্যা সমাধানৰ দিশত এতিয়া দেশত এক ডাঙৰ আৰু যোগাত্মক পদক্ষেপ গ্ৰহণ কৰা হৈছে। উল্লেখযোগ্য যে, আহমেদাবাদত অৱস্থিত দেশৰ আগশাৰীৰ ফাৰ্মা কোম্পানী জাইডাছ লাইফচায়েন্সেছে শেহতীয়াকৈ এপ’ল’ হাস্পতাল কৰ্তৃপক্ষৰ সৈতে এক অতি গুৰুত্বপূৰ্ণ বুজাবুজিৰ চুক্তি সম্পন্ন কৰিছে। এই দ্বিপাক্ষিক অংশীদাৰিত্বৰ মূল লক্ষ্য হৈছে ভাৰতীয় স্বাস্থ্য খণ্ডত কৰ্কট ৰোগ নিৰ্ণয়ৰ ক্ষেত্ৰত এক বৈপ্লৱিক পৰিৱৰ্তন অনা। এই বিশেষ চুক্তিৰ দ্বাৰাই জাইডাছ আৰু এপ’ল’ই যুটীয়াভাৱে ভাৰতত প্ৰথমবাৰৰ বাবে মুকলি কৰিছে এক অত্যাধুনিক আৰু অভিনৱ তেজ পৰীক্ষা পদ্ধতি। এই যুগান্তকাৰী পৰীক্ষা পদ্ধতিটোৰ নাম হৈছে শ্বিল্ড মাল্টি-কেঞ্চাৰ ডিটেকচন চমুকৈ এম চি ডি।
🟢 এই বিশেষ স্ক্ৰীনিং টেষ্টবিধ আমেৰিকা যুক্তৰাষ্ট্ৰৰ প্ৰিসাইজ অনক’ল’জী প্ৰতিষ্ঠান গাৰ্ডেণ্ট হেলথে দীৰ্ঘদিনীয়া নিৰন্তৰ গৱেষণা আৰু পৰীক্ষা-নিৰীক্ষাৰ অন্তত প্ৰস্তুত কৰি উলিয়াইছে। গাৰ্ডেণ্ট হেলথ হৈছে কৰ্কট ৰোগৰ গৱেষণা আৰু ৰোগ নিৰ্ণয় প্ৰযুক্তিৰ ক্ষেত্ৰত সমগ্ৰ বিশ্বৰ ভিতৰতে এক অন্যতম আগশাৰীৰ প্ৰতিষ্ঠান। তেওঁলোকে উদ্ভাৱন কৰা এই শ্বিল্ড ব্যৱস্থাটো মূলতঃ লিকুইড বায়প্সি প্ৰযুক্তিৰ ওপৰত ভিত্তি কৰি গঢ়ি উঠিছে। ভাৰতীয় চিকিৎসা বিজ্ঞানৰ ইতিহাসত প্ৰথমবাৰৰ বাবে এনেধৰণৰ মাল্টি-কেঞ্চাৰ আৰ্লি ডিটেকচন প্ৰযুক্তি সাধাৰণ ৰাইজৰ সুবিধাৰ বাবে উপলব্ধ কৰোৱা হৈছে। ইয়াৰ জৰিয়তে অতি সহজে শৰীৰত লুকাই থকা কৰ্কট ৰোগৰ কোষসমূহ অতি সূক্ষ্মভাৱে চিনাক্ত কৰিব পৰা যাব।
🟢 এই অত্যাধুনিক পৰীক্ষা পদ্ধতিটোৰ কেইটামান বিশেষ বৈশিষ্ট্য তলত উল্লেখ কৰা হ'ল:
◽ এই অত্যাধুনিক পদ্ধতিটোৰ জৰিয়তে মাত্ৰ এটা টোপাল তেজেৰেই মানৱ শৰীৰৰ ১০ বিধ ভিন্ন ধৰণৰ ভয়ংকৰ কৰ্কট ৰোগৰ লক্ষণ একেবাৰে প্ৰাথমিক অৱস্থাতেই নিৰ্ভুলভাৱে ধৰা পেলাব পৰা যাব।
◽ পৰীক্ষাগাৰত ব্যক্তিজনৰ তেজৰ নমুনা অতি সাৱধানতাৰে বিশ্লেষণ কৰি ডি এন এ ত হোৱা পৰিৱৰ্তনসমূহ নিৰীক্ষণ কৰা হয়, যিয়ে কৰ্কট ৰোগৰ উপস্থিতিৰ সংকেত দিয়ে।
◽ এই পৰীক্ষা পদ্ধতিটো ৰোগীৰ বাবে সম্পূৰ্ণৰূপে যন্ত্ৰণাৰহিত। ৰোগীয়ে কোনো ধৰণৰ অস্ত্ৰোপচাৰ বা কষ্টদায়ক চিকিৎসা প্ৰক্ৰিয়াৰ মাজেৰে যাবলগীয়া নহয়।
◽ যিসকল লোকৰ পৰিয়ালত পূৰ্বৰে পৰা কৰ্কট ৰোগৰ ইতিহাস আছে, তেওঁলোকৰ বাবে এই পৰীক্ষা অতিশয় লাভদায়ক প্ৰমাণিত হ'ব।
◽ এই ব্যৱস্থাই হাওঁফাওঁ, স্তন, কলোৰেক্টেল, প্ৰষ্টেট আদিৰ দৰে সাধাৰণতে অধিকমাত্ৰাত দেখা পোৱা কৰ্কট ৰোগসমূহ সহজে ধৰা পেলাব পাৰে।
🟢 ভাৰতৰ দৰে উন্নয়নশীল দেশ এখনৰ সামগ্ৰিক স্বাস্থ্য ব্যৱস্থাৰ বাবে শ্বিল্ড মাল্টি-কেঞ্চাৰ ডিটেকচন প্ৰযুক্তি এক ডাঙৰ আশীৰ্বাদস্বৰূপ হিচাপে পৰিগণিত হ'ব। আমাৰ সমাজত এতিয়াও বহুসংখ্যক লোকে স্বাস্থ্যৰ প্ৰতি প্ৰয়োজনীয় সজাগতাৰ অভাৱত নিয়মীয়া স্বাস্থ্য পৰীক্ষা কৰোৱাৰ পৰা আঁতৰি থাকে। কিন্তু এই নতুন তেজ পৰীক্ষা পদ্ধতিটো সাধাৰণ ৰক্ত পৰীক্ষাৰ দৰেই অতি সহজ হোৱাৰ বাবে মানুহে ইয়াক সহজেই আৰু নিৰ্ভয়ে আঁকোৱালি ল'ব বুলি স্বাস্থ্য বিশেষজ্ঞসকলে দৃঢ় বিশ্বাস ব্যক্ত কৰিছে। এপ’ল’ হাস্পতালৰ দৰে দেশৰ সৰ্ববৃহৎ চিকিৎসালয় শৃঙ্খলৰ সৈতে জাইডাছ লাইফচায়েন্সেছৰ এই গুৰুত্বপূৰ্ণ চুক্তিয়ে নিশ্চিত কৰিব যে এই জীৱনদায়িনী প্ৰযুক্তি লাহে লাহে দেশৰ চুকে-কোণে থকা সৰ্বসাধাৰণ ৰাইজলৈকো সম্প্ৰসাৰিত হয়। কৰ্কট ৰোগ নিৰ্ণয়ৰ এই সহজলভ্যতাৰ ফলত চিকিৎসকসকলে ৰোগীক অতি শীঘ্ৰে উপযুক্ত চিকিৎসা প্ৰদান কৰিব পাৰিব আৰু মৃতকৰ সংখ্যা হ্ৰাস পাব।
🟢 ভৱিষ্যতৰ দিনবোৰত এই মাল্টি-কেঞ্চাৰ ডিটেকচন পৰীক্ষাই ভাৰতীয় স্বাস্থ্য ব্যৱস্থাত এক নতুন আৰু উন্নত মানদণ্ড স্থাপন কৰিবলৈ সক্ষম হ'ব। চিকিৎসা বিশেষজ্ঞসকলৰ মতে, বয়সস্থ লোকসকল আৰু বিপদাশংকা অধিক থকা লোকসকলে তেওঁলোকৰ বাৰ্ষিক স্বাস্থ্য পৰীক্ষাৰ এক অপৰিহাৰ্য অংশ হিচাপে এই শ্বিল্ড পৰীক্ষাটো অন্তৰ্ভুক্ত কৰিব পাৰিব।
জাইডাছ লাইফচায়েন্সেছ আৰু এপ’ল’ হাস্পতলে যৌথভাৱে গ্ৰহণ কৰা এই ব্যৱস্থাই প্ৰমাণ কৰিছে যে ভাৰতীয় চিকিৎসা খণ্ডই বৰ্তমান বিশ্বমানৰ প্ৰযুক্তি ব্যৱহাৰ কৰি দেশবাসীৰ স্বাস্থ্য সুৰক্ষিত কৰাৰ ক্ষেত্ৰত আপোচ কৰিবলৈ প্ৰস্তুত নহয়। এই প্ৰযুক্তিয়ে এক অতি শক্তিশালী অস্ত্ৰ হিচাপে থিয় দিছে। মাত্ৰ এটা সৰু তেজৰ টোপালৰ জৰিয়তে নিৰৱে শৰীৰত বাহ লৈ থকা মৰণফান্দ চিনাক্ত কৰিব পৰা অসাধাৰণ ক্ষমতাই সকলোৰে বাবে অপৰিসীম আশাৰ বতৰা কঢ়িয়াই আনিছে। ই এক সুস্থ আৰু নিৰোগী ভাৰত গঢ়াৰ দিশত নিশ্চিতভাৱে এক বলিষ্ঠ ঐতিহাসিক পদক্ষেপ।
