বসন্ত আৰু বাৰিষাৰ সময়ত চিৰতা খোৱাৰ উপকাৰিতা আৰু স্বাস্থ্য লাভ
( অপূৰ্ব দাস )
প্ৰকৃতিৰ নিয়ম অনুসৰি ঋতু পৰিৱৰ্তনৰ লগে লগে আমাৰ চৌপাশৰ পৰিৱেশৰ লগতে আমাৰ শৰীৰতো বিভিন্ন পৰিৱৰ্তন দেখা যায়। বিশেষকৈ বসন্ত আৰু বাৰিষা ঋতুত প্ৰকৃতিৰ ৰূপ সলনি হোৱাৰ সমান্তৰালকৈ বায়ুমণ্ডলৰ উষ্ণতা আৰু আৰ্দ্ৰতাৰ ব্যাপক সালসলনি ঘটে। এই সময়ছোৱাত নানা ধৰণৰ ৰোগ সৃষ্টিকাৰী বীজাণু, বেক্টেৰিয়া, ভেঁকুৰ আৰু ভাইৰাছৰ প্ৰাদুৰ্ভাৱ অস্বাভাৱিকভাৱে বৃদ্ধি পায়। আমাৰ অসমীয়া পৰম্পৰাগত সমাজ ব্যৱস্থা আৰু প্ৰাচীন আয়ুৰ্বেদ শাস্ত্ৰত ঋতু পৰিৱৰ্তনৰ সময়ত মানৱ শৰীৰক ৰোগমুক্ত আৰু সৱল কৰি ৰখাৰ বাবে কিছুমান বিশেষ বনদৰব বা বনৌষধি ব্যৱহাৰৰ কঠোৰ নিয়ম বান্ধি দিয়া আছে। অসমীয়া জনজীৱনত তিতা খাদ্যৰ এক সুকীয়া স্থান আছে। তাৰ ভিতৰত অন্যতম এবিধ সৰ্বোত্তম আৰু গুণকাৰী মহৌষধ হৈছে চিৰতা।
চিৰতা এবিধ অত্যন্ত তিতা স্বাদৰ বনৌষধি উদ্ভিদ, যাক যুগ যুগ ধৰি অসমীয়া মানুহে স্বাস্থ্য ৰক্ষাৰ এক অব্যৰ্থ প্ৰাকৃতিক ঔষধ হিচাপে অত্যন্ত শ্ৰদ্ধাৰে গ্ৰহণ কৰি আহিছে। বসন্ত আৰু বাৰিষাৰ সময়ত চিৰতাৰ পানী বা চিৰতা তিতা খোৱাটো কিয় স্বাস্থ্যৰ বাবে অত্যন্ত জৰুৰী আৰু ইয়াৰ পৰা কি কি স্বাস্থ্য লাভ কৰিব পাৰি, সেই বিষয়ে তলত বিতংভাৱে আলোচনা কৰা হ'ল।
🟢 বসন্ত কালত চিৰতাৰ প্ৰয়োজনীয়তা
শীতৰ প্ৰকোপ কমাৰ অন্তত যেতিয়া বসন্তৰ আগমন ঘটে, তেতিয়া বতৰ লাহে লাহে উমাল হ’বলৈ ধৰে। এই সময়ত প্ৰকৃতিত গছ-লতিকাত নতুন কুঁহিপাত ওলোৱাৰ সমান্তৰালকৈ পৰিৱেশত বিভিন্ন ধৰণৰ বীজাণুৰো দ্ৰুতগতিত বংশবৃদ্ধি হয়। এই ঋতুত শৰীৰৰ ৰোগ প্ৰতিৰোধ ক্ষমতা কিছু পৰিমাণে দুৰ্বল হৈ পৰে।
বসন্ত কালত সাধাৰণতে বসন্ত ৰোগ বা আই, সৰুআই, বিভিন্ন ধৰণৰ ছালৰ ৰোগ, এলাৰ্জী, আৰু ভাইৰেল জ্বৰৰ প্ৰাদুৰ্ভাৱ সমাজত বেছিকৈ দেখা যায়। এই জটিল সময়ত চিৰতাই এক প্ৰাকৃতিক ৰক্ত শোধক হিচাপে অতি নিপুণভাৱে কাম কৰে। বসন্ত কালৰ আৰম্ভণিতে চিৰতাৰ পানী খালে ই শৰীৰৰ দূষিত তেজ সম্পূৰ্ণৰূপে পৰিষ্কাৰ কৰে আৰু তেজত জমা হৈ থকা ক্ষতিকাৰক দূষিত পদাৰ্থবোৰ ঘাম আৰু প্ৰস্ৰাৱৰ জৰিয়তে শৰীৰৰ পৰা বাহিৰলৈ উলিয়াই পঠায়।
তেজ পৰিষ্কাৰ হোৱাৰ ফলত ছালৰ ৰোগ, খজুৱতি, ফোঁহা আৰু এলাৰ্জীৰ দৰে যন্ত্ৰণাদায়ক সমস্যাৰ পৰা অতি সহজেই হাত সাৰিব পাৰি। তদুপৰি, চিৰতাই শৰীৰৰ স্বাভাৱিক ৰোগ প্ৰতিৰোধ ক্ষমতা ইমানেই বৃদ্ধি কৰে যে বসন্ত কালত হোৱা সংক্ৰামক ৰোগসমূহে সহজে শৰীৰক আক্ৰমণ কৰি কাবু কৰিব নোৱাৰে। সেয়েহে বসন্তৰ বতাহ গাত লগাৰ লগে লগেই চিৰতা খোৱাৰ এক স্বাস্থ্যকৰ নিয়ম আমাৰ সমাজত অতীজৰে পৰা প্ৰচলিত হৈ আহিছে।
🟢 বাৰিষা কালত চিৰতাৰ প্ৰয়োজনীয়তা
আনহাতে, গ্ৰীষ্মৰ পাছত অহা বাৰিষাৰ সময়ত অত্যধিক বৰষুণৰ ফলত আমাৰ চাৰিওফালৰ পৰিৱেশ সেমেকা আৰু জলমগ্ন হৈ পৰে। ঘৰৰ চৌপাশে আৰু গাঁৱৰ বাট-পথত পানী জমা হোৱাৰ ফলত মহ আৰু বিভিন্ন ক্ষতিকাৰক কীট-পতংগৰ দ্ৰুত বৃদ্ধি হয়। এই সময়ত মেলেৰিয়া, ডেংগু, জাপানিজ এনকেফেলাইটিছ, টাইফয়েড, কলেৰা আৰু পেটৰ নানা ধৰণৰ ভয়ানক অসুখ হোৱাৰ সম্ভাৱনা প্ৰবল হৈ পৰে।
বাৰিষাৰ দূষিত পানী আৰু লেতেৰা পৰিৱেশৰ পৰা উৎপন্ন হোৱা মাৰাত্মক বেক্টেৰিয়া আৰু ভাইৰাছ নাশ কৰিবলৈ চিৰতা অত্যন্ত কাৰ্যকৰী প্ৰমাণিত হৈছে। আয়ুৰ্বেদৰ মতে, চিৰতাত শক্তিশালী এণ্টি-বেক্টেৰিয়েল, এণ্টি-ভাইৰেল আৰু এণ্টি-পেৰাচাইটিক গুণ প্ৰচুৰ পৰিমাণে পোৱা যায়। ই মেলেৰিয়া আৰু ডেংগুৰ দৰে মহৰ দ্বাৰা বিয়পা জ্বৰ প্ৰতিৰোধ কৰাত এক গুৰুত্বপূৰ্ণ ঢাল হিচাপে কাম কৰে। চিৰতাত থকা উপাদানে শৰীৰৰ উষ্ণতা নিয়ন্ত্ৰণত ৰাখে আৰু জ্বৰৰ বীজাণু ধ্বংস কৰে।
তদুপৰি, বাৰিষা কালত বতৰৰ পৰিৱৰ্তনৰ বাবে মানুহৰ পাচন ক্ৰিয়া যথেষ্ট দুৰ্বল হৈ পৰে, যাৰ ফলত বদহজম, গেছ, এচিডিটি, পেটৰ বিষ আৰু গ্ৰহণীৰ দৰে সমস্যাই সঘনাই দেখা দিয়ে। চিৰতা তিতাই পাকস্থলীৰ পাচক ৰসৰ ক্ষৰণ বৃদ্ধি কৰে, পাকস্থলীৰ কাৰ্যক্ষমতা সক্ৰিয় কৰে আৰু সামগ্ৰিক হজম শক্তি উন্নত কৰে। সেয়েহে বাৰিষাৰ সময়ত পেটৰ আৰু ভাইৰেল ৰোগৰ পৰা পৰিত্ৰাণ পাবলৈ চিৰতা খোৱাটো অতিশয় বিজ্ঞানসন্মত আৰু লাভজনক।
🟢 চিৰতা খোৱাৰ অন্যান্য স্বাস্থ্য লাভালাভ
কেৱল বসন্ত আৰু বাৰিষাই নহয়, নিয়মীয়াকৈ নিৰ্দিষ্ট পৰিমাণত চিৰতা গ্ৰহণ কৰিলে শৰীৰৰ আন বহুতো স্বাস্থ্যজনিত উপকাৰ সাধন হয়। সেই বিশেষ লাভালাভসমূহ তলত উল্লেখ কৰা হ'ল:
🟢 ৰোগ প্ৰতিৰোধ ক্ষমতা শক্তিশালী কৰে
◽ চিৰতাত প্ৰচুৰ পৰিমাণে শক্তিশালী এণ্টি-অক্সিডেণ্ট থাকে, যিয়ে শৰীৰৰ ৰোগ প্ৰতিৰোধ ক্ষমতা বা ইমিউনিটী বহুগুণে শক্তিশালী কৰে। নিয়মীয়াকৈ চিৰতা খালে সাধাৰণ পানীলগা, কাহ আৰু বতৰ সলনি হ'লে হোৱা জ্বৰৰ পৰা সহজে উপশম পাব পাৰি।
🟢 যকৃত বা লিভাৰৰ সুৰক্ষা আৰু উন্নতি:
◽ যকৃত আমাৰ শৰীৰৰ এক অতি গুৰুত্বপূৰ্ণ অংগ। চিৰতা লিভাৰৰ বাবে এক উৎকৃষ্ট আৰু প্ৰাকৃতিক টনিক হিচাপে পৰিচিত। ই লিভাৰৰ কোষবোৰক সজীৱ আৰু কৰ্মক্ষম কৰি ৰাখে আৰু ফেটি লিভাৰ, জণ্ডিচ বা পাণ্ডুৰোগ আদি নিৰাময়ত বিশেষভাৱে সহায় কৰে। শৰীৰৰ পৰা ক্ষতিকাৰক টক্সিন নিৰ্গত কৰি লিভাৰ সম্পূৰ্ণ সুস্থ ৰখাত চিৰতাৰ ভূমিকা সঁচাকৈয়ে অপৰিসীম।
🟢 ডায়েবেটিছ বা মধুমেহ নিয়ন্ত্ৰণ:
◽ সাম্প্ৰতিক সময়ত ডায়েবেটিছ এক ভয়াৱহ সমস্যা হিচাপে থিয় দিছে। ডায়েবেটিছ ৰোগীৰ বাবে চিৰতা এক ঈশ্বৰদত্ত আশীৰ্বাদস্বৰূপ। চিৰতাই শৰীৰৰ অগ্ন্যাশয়ক সক্ৰিয় কৰি ইনচুলিনৰ স্বাভাৱিক উৎপাদন বৃদ্ধি কৰে আৰু ফলস্বৰূপে তেজৰ শৰ্কৰাৰ মাত্ৰা সঠিক নিয়ন্ত্ৰণত থাকে।
🟢 ছালৰ উজ্বলতা আৰু সৌন্দৰ্য বৃদ্ধি:
◽ যিহেতু চিৰতাই শৰীৰৰ ভিতৰৰ পৰা তেজ পৰিষ্কাৰ কৰে, সেয়েহে ইয়াৰ ধনাত্মক প্ৰভাৱ পোনপটীয়াকৈ মানুহৰ বাহ্যিক ছালত পৰে। যৌৱনকালত হোৱা শালমইনা, মুখৰ ব্ৰণ, একজিমা আদি দীৰঘদিনীয়া ছালৰ সমস্যা দূৰ কৰি ছালক প্ৰাকৃতিকভাৱে উজ্জ্বল, সতেজ আৰু মসৃণ কৰি তোলাত চিৰতা যথেষ্ট সহায়ক।
🟢 পেটৰ কৃমি নিৰ্মূল:
◽ পেটৰ কৃমি নাশ কৰিবলৈ চিৰতাৰ পানী অতীজৰে পৰা এক ফলপ্ৰসূ ঔষধ হিচাপে জনাজাত। বিশেষকৈ সৰু ল'ৰা-ছোৱালীৰ পেটত কৃমি হ'লে পুষ্টিহীনতা আৰু পেটৰ বিষে দেখা দিয়ে। এনে অৱস্থাত নিয়মীয়াকৈ চিৰতাৰ পানী খুৱালে অতি সোনকালেই সুফল পোৱা যায় আৰু কৃমি সম্পূৰ্ণ নিৰ্মূল হয়।
🟢 শৰীৰৰ ওজন নিয়ন্ত্ৰণ:
◽ বৰ্তমান মেদবহুলতা এক ডাঙৰ স্বাস্থ্যজনিত সমস্যা। চিৰতাই শৰীৰৰ বিপাকীয় ক্ৰিয়া দ্ৰুত আৰু উন্নত কৰে, যাৰ ফলত শৰীৰৰ অতিৰিক্ত চৰ্বি দহন হয় আৰু ওজন নিয়ন্ত্ৰণত ৰখাত সহায় হয়।
👉 চিৰতা খোৱাৰ সঠিক নিয়ম
যিকোনো ঔষধৰে গ্ৰহণ কৰাৰ এক নিৰ্দিষ্ট নিয়ম থাকে। চিৰতা খোৱাৰ নিয়ম বৰ সহজ আৰু সাধাৰণ। গধূলি কেইডালমান শুকান চিৰতাৰ ডাল বা কেইখনমান পাত ভালদৰে ধুই এগিলাচ পৰিষ্কাৰ পানীত তিয়াই থব লাগে। গোটেই ৰাতি তিতি থকাৰ পাছত ৰাতিপুৱা শুই উঠি খালী পেটত সেই পানীখিনি চেকি লৈ খাব লাগে। ইয়াৰ অত্যন্ত তিতা সোৱাদ কমাবৰ বাবে ইয়াৰ লগত অকণমান খাঁটি মৌজোল মিহলাই খাব পাৰি। অৱশ্যে, ডায়েবেটিছ ৰোগীয়ে কোনো ধৰণৰ মিঠৈ বা মৌজোল ব্যৱহাৰ নকৰাই স্বাস্থ্যৰ বাবে মংগলজনক।
আধুনিক চিকিৎসা বিজ্ঞান আৰু এলোপেথিক ঔষধৰ যিমানেই দ্ৰুত বিকাশ নঘটক কিয়, প্ৰাচীন কালৰে পৰা নিৰ্ভৰযোগ্যভাৱে ব্যৱহৃত হৈ অহা চিৰতাৰ দৰে অমূল্য বনৌষধিৰ গুৰুত্ব আজিও তিলমাত্ৰাও হ্ৰাস পোৱা নাই। বসন্তৰ সংক্ৰামক ভাইৰেল ৰোগ আৰু বাৰিষাৰ পেটৰ অসুখ তথা ভয়াৱহ জ্বৰৰ পৰা নিজকে আৰু নিজৰ পৰিয়ালক সুৰক্ষিত কৰি ৰাখিবলৈ প্ৰকৃতিয়ে আমাক প্ৰদান কৰা এই উপহাৰবিধ আমি সঠিকভাৱে গ্ৰহণ কৰা উচিত। ঋতু পৰিৱৰ্তনৰ স্পৰ্শকাতৰ সময়ত আমাৰ দৈনন্দিন খাদ্যাভ্যাসত তিতা স্বাদৰ এই চিৰতা অন্তৰ্ভুক্ত কৰিলে আমাৰ শৰীৰটো দীৰ্ঘায়ু, সুস্থ, সৱল আৰু সম্পূৰ্ণ ৰোগমুক্ত হৈ থাকিব। "স্বাস্থ্যই পৰম ধন", আৰু এই অমূল্য ধন আজীৱন ৰক্ষা কৰিবলৈ আমাৰ চৌপাশৰ প্ৰাকৃতিক উপায়বোৰৰ ওপৰত বিশ্বাস আৰু জ্ঞান ৰখাটোৱেই হৈছে এক সচেতন আৰু সুস্থ মানুহৰ প্ৰকৃত পৰিচয়।
