আপোনাৰ গাড়ীৰ ইন্ধন ৰাহি কৰিবলৈ এই চেটিং আজিয়েই অন কৰক।
( অপূৰ্ব দাস )
প্ৰযুক্তিৰ এই যুগত গুগল মেপছ আমাৰ দৈনন্দিন জীৱনৰ এক অপৰিহাৰ্য অংশ হৈ পৰিছে। অচিনাকি ঠাইলৈ যোৱাই হওক বা জনা পথৰে ট্ৰেফিক পৰীক্ষা কৰাই হওক, আমি সদায় গুগল মেপছৰ সহায় লওঁ। কিন্তু আপুনি জানেনে যে গুগল মেপছত এটা এনেকুৱা লুকাই থকা ছেটিং আছে, যিয়ে আপোনাৰ গাড়ীৰ ইন্ধন ৰাহি কৰাত এক ডাঙৰ ভূমিকা পালন কৰিব পাৰে? আজি আমি এই লেখাটোৰ জৰিয়তে টেক জগতৰ এই স্মাৰ্ট ফিচাৰটোৰ বিষয়ে বিতংভাৱে আলোচনা কৰিম আৰু ইয়াক কেনেকৈ সক্ৰিয় কৰিব লাগে সেই বিষয়েও জানিব পাৰিম।
📌 গুগল মেপছৰ এই বিশেষ ফিচাৰটো কি?
গুগল মেপছৰ এই বিশেষ সুবিধাটোক 'ফিউৱেল-এফিচিয়েণ্ট ৰুটছ' বা ইন্ধন ৰাহি কৰা পথ বুলি কোৱা হয়। সাধাৰণতে যেতিয়া আমি কোনো ঠাইলৈ যাবলৈ ম’বাইলত লোকেচন থাওঁ, তেতিয়া এপটোৱে আমাক আটাইতকৈ চুটি বা আটাইতকৈ কম সময়ত পাব পৰা পথটো দেখুৱায়। কিন্তু আটাইতকৈ চুটি পথটোত যে পেট্ৰ’ল বা ডিজেল কম খৰচ হ’ব, তাৰ কোনো নিশ্চয়তা নাই। এই নতুন ফিচাৰটোৱে কেৱল দূৰত্বলৈ লক্ষ্য নাৰাখি, আপোনাৰ গাড়ীৰ ইন্ধন কেনেকৈ ৰাহি হ’ব সেই দিশটো বিবেচনা কৰিহে আটাইতকৈ সঠিক পথটো বিচাৰি উলিয়ায়।
📌 ইয়াৰ দ্বাৰা পইচা আৰু ইন্ধন কেনেকৈ ৰাহি হয়?
বহু সময়ত কোনো এটা পথ চুটি হ’ব পাৰে, কিন্তু সেই পথছোৱাত তীব্ৰ যান-জঁট, ওখ-চাপৰ পাহাৰীয়া ৰাস্তা বা ভঙা-ছিঙা পথ থাকিব পাৰে। এনে পথত বাৰে বাৰে ব্ৰেক আৰু ক্লাচ ব্যৱহাৰ কৰিবলগীয়া হোৱাৰ বাবে গাড়ীৰ ইঞ্জিনে অধিক তেল খায়। যদি আপুনি ইন্ধন ৰাহি কৰা এই ফিচাৰটো অন কৰি থয়, তেন্তে মেপে আপোনাক এনে এটা পথ দেখুৱাব য’ত:
🟢 যান-জঁট বা ট্ৰেফিক বহুত কম থাকে, যাৰ ফলত গাড়ী জ্যামত আবদ্ধ হৈ পৰিব নালাগে।
🟢 ড্ৰাইভিং একেবাৰে মসৃণ হয়, অৰ্থাৎ বাৰে বাৰে ব্ৰেক মৰাৰ প্ৰয়োজন নহয়।
🟢 গাড়ীৰ ইঞ্জিনৰ ওপৰত অতিৰিক্ত চাপ নপৰে, যাৰ ফলত ৰাস্তা দীঘলীয়া হ’লেও মাইলেজ বহুত উন্নত হয়।
ধৰি লওক আপুনি কাৰ্যালয়লৈ যাব লাগে। প্ৰথম পথটো চুটি কিন্তু তাত তীব্ৰ যান-জঁট আছে। দ্বিতীয় পথটো অলপ দীঘল কিন্তু একেবাৰে খালী। এনে পৰিস্থিতিত গুগল মেপছে আপোনাক দ্বিতীয়টো পথ বাছি ল’বলৈ পৰামৰ্শ দিব, কাৰণ তাত গাড়ীখন নোৱাৰাকৈ চলিব আৰু পেট্ৰ’ল কম খৰচ হ’ব।
📌 এই ফিচাৰটো কেনেকৈ অন কৰিব?
এই স্মাৰ্ট ছেটিংটো সক্ৰিয় কৰাটো অতি সহজ। আপুনি মাত্ৰ তলত দিয়া পদক্ষেপ কেইটা অনুসৰণ কৰিব লাগিব:
◽ প্ৰথমে আপোনাৰ ম’বাইলত থকা গুগল মেপছ এপটো খোলক।
◽ ওপৰৰ সোঁফালে থকা আপোনাৰ প্ৰফাইল ফটো বা নামৰ প্ৰথম আখৰটোত ক্লিক কৰক।
◽ এতিয়া তললৈ আহি 'ছেটিংস' নামৰ বিকল্পটো বাছনি কৰক।
◽ ইয়াৰ পিছত তললৈ স্ক্ৰ’ল কৰক আৰু 'নেভিগেচন ছেটিংস'ত টেব কৰক।
◽ ইয়াত আপুনি 'প্ৰিফাৰ ফিউৱেল-এফিচিয়েণ্ট ৰুটছ' নামৰ এটা বিকল্প দেখিবলৈ পাব, ইয়াক অন কৰি দিয়ক।
📌 আপোনাৰ গাড়ীৰ ইঞ্জিনৰ প্ৰকাৰ উল্লেখ কৰক
এই ফিচাৰটোৰ আটাইতকৈ ডাঙৰ বৈশিষ্ট্যটো হ’ল ই বিভিন্ন বাহনৰ প্ৰকাৰ অনুসৰি কাম কৰে। একেটা ছেটিংচতে আপুনি নিজৰ বাহনৰ ইঞ্জিনৰ প্ৰকাৰ বাছি লোৱাৰ সুবিধা পাব। আপোনাৰ বাহনখনৰ ওপৰত ভিত্তি কৰি আপুনি পেট্ৰ’ল, ডিজেল, হাইব্ৰিড বা ইভি (বৈদ্যুতিক বাহন) বাছনি কৰিব পাৰে। ইয়াৰ পিছত গুগল মেপছে আপোনাৰ গাড়ীৰ ইঞ্জিনৰ প্ৰকৃতি বুজি সেই অনুসৰি আটাইতকৈ বেছি ইন্ধন ৰাহি কৰা পথটো আপোনাক প্ৰদৰ্শন কৰিব। এই সৰু ছেটিংটোৱে আপোনাৰ মাহিলী পেট্ৰ’ল-ডিজেলৰ খৰচ বহুখিনি হ্ৰাস কৰাত সহায় কৰিব।
