গৰমৰ দিনত খুজুলি হ'লে কি কৰিব? জানিবলৈ পঢ়িব।
( অপূৰ্ব দাস )
গৰমৰ দিনত অত্যাধিক ঘাম, ধূলি-বালি আৰু ভেঁকুৰ (fungal infection) বা বেক্টেৰিয়াৰ সংক্ৰমণৰ বাবে গা-খুজুৱা বা খজুৱতিৰ সমস্যা বহুতৰে দেখা যায়। ইয়াক সময়মতে প্ৰতিৰোধ নকৰিলে চালৰ গুৰুতৰ সমস্যা হ’ব পাৰে। এই সমস্যাৰ পৰা পৰিত্ৰাণ পাবলৈ কিছুমান কাৰ্যকৰী ঘৰুৱা আৰু এলোপেথিক চিকিৎসা তলত আলোচনা কৰা হ’ল:
🟢 ঘৰুৱা চিকিৎসা:
◽ নিম পাতৰ ব্যৱহাৰ: নিম পাতত প্ৰাকৃতিকভাৱে এন্টি-বেক্টেৰিয়েল আৰু এন্টি-ফাংগেল উপাদান থাকে। নিম পাত সিজাই লোৱা পানীৰে গা ধুলে বা নিম পাত বতি খজুৱতি হোৱা ঠাইত লগালে অতি সোনকালে উপশম পোৱা যায়।
◽ এল’ভেৰা (নহৰু মূলা): এল’ভেৰা জেল শীতলকাৰক গুণসম্পন্ন। খজুৱতি হোৱা অংশত সতেজ এল’ভেৰা জেল লগালে চালৰ জ্বলা-পোৰা আৰু খজুৱতি বহুখিনি কমে।
◽ নাৰিকল তেল আৰু কৰ্পূৰ: নাৰিকল তেলে চাল আৰ্দ্ৰ কৰি ৰাখে। অলপ নাৰিকল তেলৰ সৈতে সামান্য কৰ্পূৰ মিহলাই খজুৱতি হোৱা ঠাইত লগালে ছাল চেঁচা পৰে আৰু খজুৱতি বন্ধ হয়।
◽ চন্দনৰ প্ৰলেপ: চন্দন কাঠৰ গুৰি পানী বা গোলাপ জলেৰে মিহলাই লেপ দিলে ছালৰ উত্তাপ কমে আৰু গৰমৰ বাবে হোৱা খজুৱতি বা ঘামচিৰ সমস্যা দূৰ হয়।
◽ বেকিং চ’ডাৰ ব্যৱহাৰ: এক বাল্টি গৰম নোহোৱা পানীত এচামুচ বেকিং চ’ডা মিহলাই গা ধুলে বা ইয়াৰ পেষ্ট বনাই আক্ৰান্ত স্থানত ১০ মিনিট লগাই ধুই পেলালে আৰাম পোৱা যায়।
🟢 এলোপেথিক চিকিৎসা:
যদি ঘৰুৱা উপায়েৰে খজুৱতি কমিলৈ অহা নাই, তেন্তে ডাক্তৰৰ পৰামৰ্শ লৈ তলত দিয়া এলোপেথিক ঔষধসমূহ ব্যৱহাৰ কৰিব পাৰি:
◽ এন্টি-হিষ্টামিন টেবলেট: শৰীৰত এলাৰ্জিৰ প্ৰভাৱ কমাবলৈ আৰু বেছিকৈ খজুৱালে ডাক্তৰে Cetirizine, Levocetirizine, বা Fexofenadine জাতীয় টেবলেট খাবলৈ দিয়ে। এইবোৰে খজুৱতি সোনকালে নিয়ন্ত্ৰণ কৰে।
◽ এন্টি-ফাংগেল ক্ৰীম আৰু পাউদাৰ: গৰমত সাধাৰণতে ভেঁকুৰৰ সংক্ৰমণ বেছি হয় (যেনে- ডিঙি, কাষলতি বা কৰঙনত)। ইয়াৰ বাবে Clotrimazole, Miconazole, বা Ketoconazole যুক্ত ক্ৰীম বা ডাস্টিং পাউদাৰ দিনত দুবাৰকৈ লগাব লাগে।
◽ কেলিয়ামাইন লোচন: ছালত খজুৱতি বা ৰঙা পৰা ভাব হ’লে Calamine Lotion (যেনে- Caladryl) লগালে ছাল ঠাণ্ডা হয় আৰু খজুৱতিৰ পৰা তৎক্ষণাত সকাহ পোৱা যায়।
◽ হাইড্ৰ’কৰ্টিছন ক্ৰীম: ছালখন যদি অতিমাত্ৰা ৰঙা পৰি ফুলি উঠে, তেন্তে মৃদু শক্তিসম্পন্ন Hydrocortisone Cream ডাক্তৰৰ পৰামৰ্শমতে কম দিনৰ বাবে ব্যৱহাৰ কৰিব পাৰি।
🟢 গৰমৰ দিনত ল’বলগীয়া সাৱধানতা:
◽ দিনটোত অন্ততঃ দুবাৰকৈ গা ধুব লাগে আৰু গা ধোৱাৰ পিছত শৰীৰটো সদায় শুকানকৈ ৰাখিব লাগে।
◽ সদায় ঢিলা আৰু কপাহী (cotton) কাপোৰ পৰিধান কৰিব লাগে, যাতে শৰীৰত বতাহ চলাচল কৰিব পাৰে।
◽ প্ৰচুৰ পৰিমাণে পানী, নেমুৰ ৰস বা ডাবৰ পানী খাব লাগে, যাতে শৰীৰটো হাইড্ৰেটেড হৈ থাকে।
◽ খজুৱতি হোৱা ঠাইখিনিত নখেৰে খজুৱাব নালাগে, অন্যথা ইনফেকচন বাঢ়ি যাব পাৰে।
◽ আনৰ ব্যৱহৃত টাৱেল, কাপোৰ-কানি আদি ব্যৱহাৰ কৰাৰ পৰা বিৰত থাকিব লাগে।
প্ৰাথমিক অৱস্থাত ঘৰুৱা যত্ন লৈ বা ফাৰ্মাচীৰ পৰা ওচৰৰ ডাক্তৰৰ পৰামৰ্শ লৈ চিকিৎসা কৰিলে গৰমৰ খজুৱতিৰ পৰা সহজে হাত সাৰিব পাৰি। কিন্তু খজুৱতি যদি অতিমাত্ৰা বাঢ়ি যায় বা ছালত ঘাঁৰ সৃষ্টি হয়, তেন্তে পলম নকৰি চৰ্মৰোগ বিশেষজ্ঞৰ কাষ চাপা উচিত।
