বজ্ৰপাতৰ পৰা সাৱধান! কেনেকৈ ৰক্ষা কৰিব আপোনাৰ ঘৰটো? জানিবলৈ পঢ়িব।
( অপূৰ্ব দাস )
প্ৰকৃতিৰ এক অতি ভয়ংকৰ আৰু ধ্বংসাত্মক পৰিঘটনা হৈছে বজ্ৰপাত। অসম তথা উত্তৰ-পূৰ্বাঞ্চলত বৰষুণ আৰু কালধুমুহাৰ সময়ত বজ্ৰপাত সঘনাই হোৱা দেখা যায়। প্ৰতি বছৰে বজ্ৰপাতৰ ফলত বহুতো মানুহৰ লগতে জীৱ-জন্তুৰ প্ৰাণহানি হয় আৰু সা-সম্পত্তিৰো বিস্তৰ ক্ষতিসাধন হয়।
বিশেষকৈ মানুহৰ বাসস্থান অৰ্থাৎ ঘৰবোৰ বজ্ৰপাতৰ পৰা সুৰক্ষিত কৰি ৰখাটো অতি প্ৰয়োজনীয়। ঘৰত বজ্ৰপাত পৰিলে ঘৰটোৰ বৈদ্যুতিক সঁজুলিবোৰ জ্বলি যোৱাৰ উপৰিও ঘৰটোত জুই লগাৰো অতিমাত্ৰা সম্ভাৱনা থাকে। সেয়েহে, নিজৰ আৰু পৰিয়ালৰ নিৰাপত্তাৰ বাবে ঘৰত বজ্ৰপাত নপৰিবলৈ আৰু ইয়াৰ প্ৰভাৱৰ পৰা হাত সাৰিবলৈ কিছুমান বিশেষ সতৰ্কতামূলক ব্যৱস্থা গ্ৰহণ কৰা উচিত। ঘৰত বজ্ৰপাত নপৰিবলৈ আৰু ইয়াৰ ভয়াৱহ ক্ষতিৰ পৰা হাত সাৰিবলৈ ল'বলগীয়া ব্যৱস্থাসমূহ তলত বিতংভাৱে লিখিলোঁ।
🔴 বজ্ৰপাত নিবাৰক যন্ত্ৰ বা লাইটনিং এৰেষ্টাৰ স্থাপন
ঘৰক বজ্ৰপাতৰ পোনপটীয়া আঘাতৰ পৰা ৰক্ষা কৰাৰ আটাইতকৈ ফলপ্ৰসূ আৰু গুৰুত্বপূৰ্ণ উপায়টো হৈছে ঘৰৰ চালত বা আটাইতকৈ ওখ অংশত বজ্ৰপাত নিবাৰক যন্ত্ৰ লগোৱা।
◽ এই যন্ত্ৰটো সাধাৰণতে তাম বা এলুমিনিয়ামেৰে নিৰ্মিত এডাল ওখ দণ্ড, যিটো ঘৰৰ আটাইতকৈ ওখ স্থানত স্থাপন কৰা হয়।
◽ যেতিয়া আকাশত বজ্ৰপাত হয়, তেতিয়া এই দণ্ডডালে বিদ্যুতৰ প্ৰবাহক নিজৰ ফালে আকৰ্ষণ কৰি লয় আৰু ঘৰটোক ৰক্ষা কৰে।
◽ এই দণ্ডডালৰ লগত এডাল ডাঠ তামৰ তাঁৰ সংযুক্ত কৰা থাকে যিডাল পোনে পোনে মাটিত দকৈ পোঁতা থাকে।
◽ ইয়াৰ ফলত বজ্ৰপাতৰ বিশাল বৈদ্যুতিক শক্তি ঘৰৰ কোনো ক্ষতি নকৰাকৈ পোনে পোনে মাটিলৈ গুচি যায়।
🔴 সুনিশ্চিত আৰ্থিং ব্যৱস্থা
বজ্ৰপাতৰ পৰা সুৰক্ষা পাবলৈ ঘৰৰ বৈদ্যুতিক ব্যৱস্থাত সঠিক আৰ্থিং থকাটো নিতান্তই প্ৰয়োজনীয়।
◽ আৰ্থিং ব্যৱস্থাই ঘৰৰ বৈদ্যুতিক বৰ্তনীত হোৱা অতিৰিক্ত বিদ্যুতৰ প্ৰবাহক নিৰাপদে মাটিলৈ প্ৰেৰণ কৰে।
◽ এটা ভাল আৰ্থিং ব্যৱস্থাৰ বাবে মাটিত দকৈ গাঁত খান্দি তামৰ প্লেট আৰু নিমখ-কয়লা দি সঠিকভাৱে সংযোগ কৰিব লাগে।
◽ সময়মতে আৰ্থিং ব্যৱস্থাটো পৰীক্ষা কৰি থকাটো দৰকাৰ, যাতে ইয়াৰ কাৰ্যক্ষমতা অটুট থাকে।
◽ আৰ্থিং সঠিক নহ'লে বজ্ৰপাতৰ সময়ত বৈদ্যুতিক শ্বক লগাৰ লগতে ঘৰৰ সকলো সামগ্ৰী নষ্ট হোৱাৰ ভয় থাকে।
🔴 চাৰ্জ প্ৰটেক্টৰ ব্যৱহাৰ
বজ্ৰপাতৰ সময়ত হঠাতে বিদ্যুতৰ ভল্টেজ বহুত বেছি বাঢ়ি যাব পাৰে, যাক পাৱাৰ চাৰ্জ বোলা হয়।
◽ ঘৰৰ মূল্যৱান বৈদ্যুতিক সামগ্ৰী যেনে টিভি, ফ্ৰীজ, কম্পিউটাৰ আদি ৰক্ষা কৰিবলৈ চাৰ্জ প্ৰটেক্টৰ ব্যৱহাৰ কৰিব লাগে।
◽ ঘৰৰ মেইন ছুইচ বৰ্ডত এটা উন্নত মানৰ চাৰ্জ প্ৰটেক্টৰ লগালে গোটেই ঘৰটোৰ বৈদ্যুতিক ব্যৱস্থা সুৰক্ষিত হয়।
🔴 বৈদ্যুতিক সংযোগ বিচ্ছিন্ন কৰা
ধুমুহা আৰু বিজুলী-ঢেৰেকণি অহাৰ আগতেই কিছুমান সাৱধানতা অৱলম্বন কৰিব লাগে।
◽ আকাশত ক'লা ডাৱৰ দেখিলে বা বিজুলী মাৰিলে লগে লগে ঘৰৰ সকলো বৈদ্যুতিক সঁজুলিৰ প্লাগ খুলি থব লাগে।
◽ কেৱল চুইচ অফ কৰি থলেই নহ'ব, প্লাগটো ছকেটৰ পৰা সম্পূৰ্ণৰূপে উলিয়াই থোৱাটো নিশ্চিত কৰিব লাগে, কাৰণ বিদ্যুৎ প্লাগৰ মাজেৰেও পাৰ হৈ আহিব পাৰে।
🔴 ঘৰৰ চাৰিওফালৰ পৰিৱেশ আৰু গছ-গছনিৰ যতন
ঘৰৰ ওচৰত থকা ওখ গছ-গছনিৰ পৰাও বজ্ৰপাতৰ বিপদ ঘৰলৈ আহিব পাৰে।
◽ ঘৰৰ একেবাৰে গাতে লাগি থকা ওখ গছৰ ডালবোৰ কাটি পৰিষ্কাৰ কৰি ৰাখিব লাগে, কাৰণ গছত বজ্ৰপাত পৰিলে জুই ঘৰলৈ বিয়পিব পাৰে।
◽ ঘৰৰ চালত এন্টেনা বা ডিচ থাকিলে সেইবোৰৰো সঠিক আৰ্থিং কৰিব লাগে।
🔴 বজ্ৰপাতৰ সময়ত ঘৰৰ ভিতৰত ল'বলগীয়া সাৱধানতা
বজ্ৰপাত পৰা ৰোধ কৰাৰ লগতে ঘৰৰ ভিতৰত থকা মানুহৰ নিৰাপত্তাৰ প্ৰতিও ধ্যান দিয়াটো জৰুৰী।
◽ বজ্ৰপাতৰ সময়ত পানীৰ পাইপ বা টেপৰ পৰা পানী ব্যৱহাৰ কৰা অনুচিত, কাৰণ ধাতুৰ পাইপৰ মাজেৰে বিদ্যুৎ প্ৰবাহিত হ'ব পাৰে।
◽ তাঁৰ থকা লেণ্ডলাইন ফোন ব্যৱহাৰ কৰাৰ পৰা বিৰত থাকিব লাগে।
◽ খিৰিকী আৰু দুৱাৰ বন্ধ কৰি ৰাখিব লাগে আৰু লোহাৰ বস্তু স্পৰ্শ কৰাৰ পৰা বিৰত থাকিব লাগে।
বজ্ৰপাত এক প্ৰাকৃতিক দুৰ্যোগ, যাক আমি কোনেও বন্ধ কৰিব নোৱাৰো। কিন্তু উপযুক্ত প্ৰযুক্তি আৰু সজাগতাৰ জৰিয়তে আমি আমাৰ ঘৰটোক ইয়াৰ ভয়ংকৰ প্ৰভাৱৰ পৰা নিশ্চিতভাৱে ৰক্ষা কৰিব পাৰো। ঘৰ সাজোতে এজন অভিজ্ঞ ইলেক্ট্ৰিচিয়ানৰ পৰামৰ্শ লৈ উন্নত মানৰ লাইটনিং এৰেষ্টাৰ আৰু আৰ্থিং ব্যৱস্থা স্থাপন কৰাটো এক প্ৰকাৰৰ অতি প্ৰয়োজনীয় বিনিয়োগ, যিয়ে আমাৰ জীৱন আৰু সম্পত্তি দুয়োটাকে নিৰাপত্তা প্ৰদান কৰে। প্ৰাকৃতিক দুৰ্যোগৰ সময়ত ভয় নাখাই সঠিক জ্ঞান আৰু সতৰ্কতাৰে পৰিস্থিতিৰ মোকাবিলা কৰিলে বজ্ৰপাতৰ দৰে বৃহৎ বিপদৰ পৰা সহজে হাত সাৰিব পৰা যায়। আজিয়েই আপোনাৰ ঘৰৰ বজ্ৰপাত প্ৰতিৰোধী ব্যৱস্থাসমূহ পৰীক্ষা কৰক আৰু নিজৰ পৰিয়ালক সুৰক্ষিত কৰক।
