গৰ্ভৱতী মহিলাই কি কি খাদ্য গ্ৰহণ কৰাৰ পৰা আঁতৰি থাকিব লাগে? সাৱধান হ'ব!
(লেখক: অপূৰ্ব দাস)
গৰ্ভাৱস্থা এটা অতি সংবেদনশীল আৰু গুৰুত্বপূৰ্ণ সময়। এই সময়ছোৱাত মহিলাৰ শৰীৰত কেৱল হৰম’নৰ পৰিৱৰ্তন হোৱাই নহয়, গৰ্ভস্থ শিশুৰ সামগ্ৰিক বিকাশও মাতৃৰ খাদ্যৰ ওপৰত নিৰ্ভৰ কৰে। কেতিয়াবা কিছুমান অনিচ্ছাকৃত খাদ্যই ভ্ৰুণ আৰু মাতৃ উভয়ৰে বাবে গুৰুতৰ ভাবুকি কঢ়িয়াই আনিব পাৰে। গতিকে গৰ্ভাৱস্থাত কি খাব লাগে আৰু কি নাখাব লাগে সেই সম্পৰ্কে সঠিক তথ্য লাভ কৰাটো অতি গুৰুত্বপূৰ্ণ। এগৰাকী গৰ্ভৱতী মহিলাই পৰিহাৰ কৰিবলগীয়া খাদ্যসমূহৰ বিষয়ে বিতংভাৱে জনাওঁ আহক -
(১) অমিতা
গৰ্ভাৱস্থাত বেছিকৈ চৰ্চিত হোৱা এবিধ ফল হৈছে অমিতা। ইয়াত লেটেক্স আৰু পেপেইন নামৰ যৌগ থাকে। এই দুয়োটাই জৰায়ুৰ পেশীৰ সংকোচন বৃদ্ধি কৰিব পাৰে।
ইয়াৰ ফলত গৰ্ভপাতৰ সম্ভাৱনা বৃদ্ধি পাব পাৰে।
বিশেষকৈ প্ৰথম তিনিমাহত কেঁচা বা পকা অমিতা অত্যন্ত বিপদজনক বুলি গণ্য কৰা হয়।
মন কৰিব যে সম্পূৰ্ণ পকা অমিতা মাজে মাজে একেবাৰে কম পৰিমাণত নিৰাপদ হ’ব পাৰে, কিন্তু চিকিৎসকৰ পৰামৰ্শ নোহোৱাকৈ খাব নালাগে।
(২) আনাৰস
আনাৰসত ব্ৰ’মেলিন নামৰ এবিধ এনজাইম থাকে। ই জৰায়ুৰ মুখ কোমল কৰিব পাৰে।
ইয়াক সেৱন কৰিলে অকাল প্ৰসৱ বা গৰ্ভপাতৰ সম্ভাৱনা বৃদ্ধি পাব পাৰে। গৰ্ভৱতী মহিলাই আনাৰস সম্পূৰ্ণৰূপে পৰিহাৰ কৰাটো ভাল।
(৩) শুকান মাছ, আধাসিজা বা বাহি মাংস
গৰ্ভাৱস্থাত বাহি মাংস আৰু কমকৈ সিজোৱা মাংস অত্যন্ত বিপদজনক হ’ব পাৰে, লগতে শুকান মাছ।ইয়াত লিষ্টেৰিয়া, ছালমোনেলা, টক্সিপ্লাজমা আদি বেক্টেৰিয়া আৰু পৰজীৱী থাকিব পাৰে। এই সংক্ৰমণ কেৱল মাতৃৰ বাবেই ক্ষতিকাৰক নহয়, শিশুৰ মগজু আৰু স্নায়ুতন্ত্ৰৰ বিকাশতো ক্ষতিকাৰক হ’ব পাৰে। গৰ্ভাৱস্থাত ভালদৰে সিজোৱা মাংসহে খাব লাগে। বাহি খাদ্য খাব নালাগে।
(৪) কমকৈ সিজোৱা আৰু কেঁচা কণী
কেঁচা বা কমকৈ সিজোৱা কণী খোৱাৰ ফলত গুৰুতৰ সংক্ৰমণৰ আশংকা থাকে। ইয়াত ছালমনেলা বেক্টেৰিয়া থাকিব পাৰে। ইয়াৰ ফলত খাদ্য বিষক্ৰিয়া, উচ্চ জ্বৰ, বমি, ডায়েৰিয়া আদি হ’ব পাৰে।
• ইয়াৰ উপৰিও মেয়নিজ, কেঁচা কণীৰে তৈয়াৰী কেক বা মিঠাই, আধা সিজোৱা কণীও পৰিহাৰ কৰিব লাগে। কণী সদায় ভালদৰে সিজাই খাব লাগে।
(৫) কেফেইন (চাহ, কফি, শীতল পানীয়)
গৰ্ভাৱস্থাত অত্যধিক কেফেইন সেৱন কৰাটো ক্ষতিকাৰক।
অত্যধিক কেফেইন খালে ভ্ৰুণৰ জন্মৰ সময়ত ওজন কম হয় আৰু গৰ্ভপাতৰ সম্ভাৱনা বৃদ্ধি পায়। বিশেষজ্ঞসকলৰ মতে, প্ৰতিদিনে ২০০ মিলিগ্ৰামতকৈ অধিক কেফেইন সেৱন কৰিব নালাগে। গতিকে অত্যধিক চাহ, কফি, শীতল পানীয়, এনাৰ্জি ড্ৰিংকছৰ পৰা বিৰত থাকিব লাগে।
(৬) মদ্যপান
গৰ্ভাৱস্থাত মদ্যপান কঠোৰভাৱে নিষিদ্ধ। মাতৃৰ তেজৰ জৰিয়তে পোনে পোনে মদ শিশুৰ দেহলৈ যায়। ইয়াৰ ফলত ভ্ৰুণৰ এলকহল চিনড্ৰম হ’ব পাৰে।
ইয়াৰ ফলত হ'ব পাৰে:
• শিশুৰ মানসিক বিকাশ স্তব্ধ হ’ব পাৰে,
• মুখ আৰু অংগ-প্ৰত্যংগৰ বিকৃতি,
• আজীৱন শিক্ষণৰ অসুবিধা।
• সেয়েহে কম পৰিমাণৰ মদ খালেও নিৰাপদ বুলি গণ্য কৰা নহয়।
(৭) কমকৈ সিজোৱা বা বাহি খাদ্য
পথৰ কাষৰ খাদ্য, বাহি খাদ্য, আৰু কমকৈ সিজোৱা খাদ্য গৰ্ভৱতী মহিলাৰ বাবে বিপদজনক। এনে খাদ্যত বেক্টেৰিয়া দ্ৰুতগতিত বৃদ্ধি পায়।
খাদ্য বিষক্ৰিয়াৰ ফলত মাতৃৰ বিভিন্ন স্বাস্থ্য সমস্যা আৰু দুৰ্বলতা হ’ব পাৰে, যাৰ ফলত শিশুটোৰ ওপৰত বেয়া প্ৰভাৱ পৰে।
(৮) কেঁচা বা কমকৈ ধোৱা শাক-পাচলি
সেউজীয়া শাক-পাচলি স্বাস্থ্যকৰ, কিন্তু ভালদৰে ধুব নোৱাৰিলে মলি আৰু বীজাণু থাকি যায় । ইয়াৰ ফলত টক্সিপ্লাজমোচিছৰ দৰে সংক্ৰমণৰ আশংকা থাকে। কেঁচা চালাড খোৱাৰ সময়ত বিশেষ সাৱধানতা অৱলম্বন কৰিব লাগে।
(৯) অত্যধিক নিমখ আৰু প্ৰচেছড খাদ্য
চিপচ, স্নেক, পেকেজড ফুড, আৰু ফাষ্ট ফুড:
• উচ্চ ৰক্তচাপ,
• ফুলা (এডিমা),
• প্ৰি-এক্লেম্পচিয়া হ’ব পাৰে।
(১০) প্ৰেছক্ৰিপচন অবিহনে আয়ুৰ্বেদিক বা বনৌষধি ঔষধ
খোৱা উচিত নহয়
বহু মহিলাই গৰ্ভাৱস্থাত ঘৰুৱা ঔষধ বা বনৌষধিৰ আশ্ৰয় লয়। কিছুমান বনৌষধিয়ে জৰায়ুক উদ্দীপিত কৰিব পাৰে। চিকিৎসকৰ পৰামৰ্শ নোহোৱাকৈ কোনো বনৌষধি চাহ বা ঔষধ গ্ৰহণ নকৰিব।
গৰ্ভাৱস্থাত অলপ অসাৱধানতা ভয়াৱহ বিপদৰ সৃষ্টি কৰিব পাৰে। খাদ্য সতেজ, পৰিষ্কাৰ, আৰু ভালদৰে ৰান্ধি খোৱা উচিত। সন্দেহজনক খাদ্য পৰিহাৰ কৰক।
যিকোনো নতুন খাদ্য ,ঔষধ, ভিটামিন গ্ৰহণ কৰাৰ আগতে চিকিৎসকৰ পৰামৰ্শ লওক।
স্বাস্থ্যসন্মত খাদ্যই মাতৃক সুস্থ কৰি ৰখাই নহয় ভ্ৰুণৰ নিৰাপদ আৰু সম্পূৰ্ণ বিকাশৰ ভেটিও শক্তিশালী কৰে। সাৱধান হওক, সজাগ হওক, আৰু সুস্থ মাতৃত্বৰ দিশত আগবাঢ়ি যাওক।
