আজি ৰাষ্ট্ৰীয় কৃষি দিৱস: খাদ্য উৎপাদনকাৰী বা অন্নদাতাক সন্মান জনোৱাৰ উদযাপন
(অপূৰ্ব দাস)
ভাৰত এখন কৃষিপ্ৰধান দেশ। ইয়াৰ জনসংখ্যাৰ প্ৰায় ৬০–৬৫ শতাংশই প্ৰত্যক্ষ বা পৰোক্ষভাৱে কৃষিৰ ওপৰত নিৰ্ভৰশীল। আমাৰ দেশৰ অৰ্থনীতি, সংস্কৃতি, জীৱনশৈলীত কৃষিয়ে গুৰুত্বপূৰ্ণ ভূমিকা পালন কৰে। কৃষকৰ কঠোৰ পৰিশ্ৰম আৰু ত্যাগেই আমাৰ জনসংখ্যাৰ বিপুল সংখ্যকক খাদ্য যোগান ধৰে। কৃষকৰ অৱদান আৰু কৃষিৰ গুৰুত্বৰ ওপৰত আলোকপাত কৰিবলৈ প্ৰতি বছৰে ২৩ ডিচেম্বৰত ৰাষ্ট্ৰীয় কৃষি দিৱস পালন কৰা হয়। কৃষকৰ অধিকাৰ আৰু কৃষি সংস্কাৰৰ বাবে সমগ্ৰ জীৱন উৎসৰ্গা কৰা ভাৰতৰ পঞ্চম প্ৰধানমন্ত্ৰী চৌধুৰী চৰণ সিঙৰ জন্ম বাৰ্ষিকীও এই দিৱসত পালন কৰা হয়।
◽ৰাষ্ট্ৰীয় কৃষি দিৱসৰ তাৎপৰ্য
ৰাষ্ট্ৰীয় কৃষি দিৱস কেৱল এটা তাৰিখ নহয়, বৰঞ্চ আমাক খাদ্য যোগান ধৰা আমাৰ কৃষকসকলৰ প্ৰতি সন্মান, কৃতজ্ঞতা, আৰু সজাগতাৰ প্ৰতীক। এই দিনটোৱে আমাক সোঁৱৰাই দিয়ে যে আমাৰ কাহীত পোৱা প্ৰতিটো শস্য তেওঁলোকৰ অক্লান্ত কষ্টৰ ফল। চোকা ৰʼদত পথাৰত দেহৰ ঘাম মাটিত পেলাই কৰা খেতিৰ বাবে কৃষকসকলেই দেশৰ খাদ্য সুৰক্ষাৰ ভেটি। এই দিনটোৰ জৰিয়তে চৰকাৰ আৰু সমাজে কৃষিৰ লগত জড়িত সমস্যা, প্ৰত্যাহ্বান, সমাধানৰ ওপৰত চিন্তা-চৰ্চা কৰে।
◽চৌধুৰী চৰণ সিং আৰু কৃষি
চৌধুৰী চৰণ সিঙক "কৃষকৰ প্ৰেৰণা" বুলি জনা যায়। জমিদাৰী ব্যৱস্থা বিলুপ্ত, ভূমি সংস্কাৰ, ক্ষুদ্ৰ আৰু প্ৰান্তীয় কৃষকৰ কল্যাণৰ বাবে তেওঁ বহু গুৰুত্বপূৰ্ণ পদক্ষেপ গ্ৰহণ কৰিছিল। তেওঁ বিশ্বাস কৰিছিল যে কৃষকক সৱলীকৰণ নকৰালৈকে দেশৰ বাবে অগ্ৰগতি অসম্ভৱ। ৰাষ্ট্ৰীয় কৃষি দিৱসতো তেওঁৰ চিন্তা-চৰ্চা আৰু সংগ্ৰাম স্মৰণ কৰাৰ এক অনুষ্ঠান।
◽ভাৰতীয় কৃষিৰ ৰাজ্য
ভাৰতৰ কৃষি কেৱল ব্যৱসায় নহয়, জীৱনৰ আধাৰ। ইয়াত ধান, ঘেঁহু, কুঁহিয়াৰ, দালি, সৰিয়হ, বাদাম, কপাহ, ফল-মূল, শাক-পাচলি আদি বিভিন্ন ধৰণৰ শস্য পোৱা যায়। সেউজ বিপ্লৱে দেশখনক খাদ্য শস্য উৎপাদনত স্বাৱলম্বী কৰি তুলিছিল যদিও আজিও কৃষকসকলে অসংখ্য সমস্যাৰ সন্মুখীন হৈ আছে । জলবায়ু পৰিৱৰ্তন, অস্বাভাৱিক বৰষুণ, বৃদ্ধি পোৱা খৰচ, বজাত কম মূল্য, ঋণৰ বোজা, বজাৰৰ অস্থিৰতাই কৃষিক্ষেত্ৰত প্ৰভাৱ পেলাইছে।
◽আধুনিক কৃষি আৰু প্ৰযুক্তিবিদ্যা
কৃষিক্ষেত্ৰত আধুনিক প্ৰযুক্তিৰ ভূমিকা আজি দ্ৰুতগতিত বৃদ্ধি পাইছে। ড্ৰিপ জলসিঞ্চন, স্প্ৰিংকলাৰ ব্যৱস্থা, উন্নত বীজ, জৈৱিক কৃষি, ডিজিটেল কৃষি মঞ্চ, কৃষি যন্ত্ৰৰ ব্যৱহাৰৰ জৰিয়তে উৎপাদন বৃদ্ধি কৰিব পাৰি। প্ৰধানমন্ত্ৰী কিষাণ সন্মান নিধি, শস্য বীমা আঁচনি, মাটি স্বাস্থ্য কাৰ্ড, কৃষি আঁচনিৰ দৰে চৰকাৰী আঁচনিসমূহে কৃষকসকলক আৰ্থিক আৰু কাৰিকৰী সহায় আগবঢ়াইছে। ৰাষ্ট্ৰীয় কৃষি দিৱসত এই আঁচনিসমূহৰ বিষয়ে কৃষকসকলৰ মাজত তথ্য প্ৰচাৰৰ প্ৰচেষ্টা চলোৱা হয়।
◽কৃষকৰ ভূমিকা আৰু সন্মান
কৃষকসকল কেৱল খাদ্য উৎপাদক নহয়, সমাজৰ মেৰুদণ্ডো। কঠিন পৰিস্থিতিতো পথাৰত কাম কৰে—কেতিয়াবা গৰম, কেতিয়াবা ঠাণ্ডা আৰু বৰষুণতো। তেওঁলোকৰ অবিহনে এখন দেশ কল্পনা কৰিব নোৱাৰি। গতিকে ৰাষ্ট্ৰীয় কৃষি দিৱসে কৃষকৰ প্ৰতি সন্মান আৰু সহযোগিতাৰ মনোভাৱ গঢ়ি তুলিবলৈ আমাক অনুপ্ৰাণিত কৰে।
◽যুৱক-যুৱতীৰ অংশগ্ৰহণ
আজি নৱপ্ৰজন্মই কৃষিক আকোৱালি লৈ আধুনিক, লাভজনক, আৰু সন্মানীয় বৃত্তি হিচাপে গঢ়ি তোলাৰ প্ৰয়োজনীয়তা আহি পৰিছে। ষ্টাৰ্টআপ, কৃষি ব্যৱসায়, জৈৱিক কৃষি, খাদ্য প্ৰক্ৰিয়াকৰণ আদি ক্ষেত্ৰত কৃষিৰ অপৰিসীম সম্ভাৱনা আছে। ৰাষ্ট্ৰীয় কৃষি দিৱসে যুৱক-যুৱতীসকলক কৃষিৰ লগত জড়িত আৰু উদ্ভাৱন কৰিবলৈ অনুপ্ৰাণিত কৰে।
ৰাষ্ট্ৰীয় কৃষি দিৱসে আমাক সোঁৱৰাই দিয়ে যে জাতিৰ সমৃদ্ধি কৃষকৰ মংগলৰ সৈতে জড়িত। কৃষক শক্তিশালী হ’লে জাতি শক্তিশালী হ’ব। আমি কেৱল এদিনৰ বাবে নহয়, প্ৰতিদিনে কৃষকক সন্মান জনোৱাৰ লগতে তেওঁলোকৰ সমস্যা সমাধান, কৃষি বিকাশৰ বাবে চেষ্টা কৰিব লাগিব। এয়াই ৰাষ্ট্ৰীয় কৃষি দিৱসৰ প্ৰকৃত উদ্দেশ্য আৰু বাৰ্তা।
