বিটৰ অলৌকিক উপকাৰ: হৃদযন্ত্ৰ, মগজু, তেজ আৰু যকৃতৰ বাবে এক আশীৰ্বাদ
(অপূৰ্ব দাস)
বিট পুষ্টিকৰ উপাদানৰ ভঁৰাল বুলি গণ্য কৰা হয়। ইয়াৰ গভীৰ ৰঙা ৰংটোৱে নিজেই ইংগিত দিয়ে যে ইয়াত বহুতো শক্তিশালী এন্টিঅক্সিডেন্ট, ভিটামিন আৰু খনিজ পদাৰ্থ থাকে। আয়ুৰ্বেদৰ পৰা আধুনিক পুষ্টি বিজ্ঞানলৈকে বিট স্বাস্থ্যৰ বাবে অত্যন্ত উপকাৰী বুলি গণ্য কৰা হয়। দৈনন্দিন খাদ্যত বিট অন্তৰ্ভুক্ত কৰিলে সামগ্ৰিক স্বাস্থ্য উন্নত হ’ব পাৰে। বিট আমাৰ শৰীৰৰ বাবে কেনেদৰে উপকাৰী বুলি প্ৰমাণিত হ’ব পাৰে তলত উল্লেখ কৰা হ'ল -
◽হৃদযন্ত্ৰৰ স্বাস্থ্যৰ বাবে উপকাৰী
হৃদযন্ত্ৰৰ স্বাস্থ্যৰ বাবে বিট এক আশীৰ্বাদ। ইয়াত থকা নাইট্ৰেট শৰীৰত নাইট্ৰিক অক্সাইডলৈ ৰূপান্তৰিত হয়, যাৰ ফলত ৰক্তবাহী নলী প্ৰসাৰিত হয় আৰু তেজৰ সোঁত উন্নত হয়। এই কাৰণেই বিট সেৱনে উচ্চ ৰক্তচাপ নিয়ন্ত্ৰণত সহায় কৰিব পাৰে। নিয়মিতভাৱে বিটৰ ৰস বা চালাড খালে হাৰ্ট এটেক, ষ্ট্ৰোকৰ দৰে গুৰুতৰ ৰোগৰ সম্ভাৱনা হ্ৰাস পাব পাৰে। উচ্চ ৰক্তচাপত আক্ৰান্তসকলৰ বাবে বিট প্ৰাকৃতিক ঔষধ হিচাপে প্ৰমাণিত হ’ব পাৰে।
◽ৰক্তহীনতা হ্ৰাস কৰাত সহায় কৰে
বিটক তেজ বৃদ্ধি কৰা খাদ্য হিচাপেও জনা যায়। ইয়াত ভাল পৰিমাণৰ আইৰণ, ফলেট, ভিটামিন চি থাকে, যিয়ে হিম’গ্লবিন বৃদ্ধি কৰাত সহায় কৰে। ৰক্তহীনতাত আক্ৰান্তসকলৰ বাবে বিট খোৱাটো অত্যন্ত উপকাৰী বুলি বিবেচিত হয়। বিশেষকৈ মহিলা আৰু শিশুসকলে খাদ্যত বিট অন্তৰ্ভুক্ত কৰিব লাগে। যিকোনো ৰূপত- বিটৰ ৰস, বিটৰ পাচলি বা চালাড—সেৱন কৰিলে উপকাৰী হ’ব পাৰে।
◽মগজুৰ স্বাস্থ্য আৰু মগজুৰ কাৰ্য্যক্ষমতা উন্নত কৰে
মগজুৰ স্বাস্থ্যৰ বাবেও বিট অতি উপকাৰী। ই মগজুত ৰক্ত সঞ্চালন উন্নত কৰাত সহায় কৰে, যাৰ ফলত ই পৰ্যাপ্ত পৰিমাণৰ অক্সিজেন আৰু পুষ্টিকৰ উপাদান লাভ কৰাটো নিশ্চিত কৰে। ইয়াৰ ফলত স্মৃতিশক্তি শক্তিশালী হয় আৰু একাগ্ৰতা বৃদ্ধি পায়। বয়স বৃদ্ধিৰ লগে লগে মগজুৰ লগত জড়িত সমস্যা যেনে ডিমেনচিয়া বা স্মৃতিশক্তি হেৰুৱাৰ সম্ভাৱনাও হ্ৰাস কৰাত বিটে সহায় কৰিব পাৰে। ছাত্ৰ-ছাত্ৰী আৰু মানসিক কাম-কাজত জড়িত থকা লোকৰ বাবে বিট খোৱাটো বিশেষভাৱে উপকাৰী বুলি বিবেচিত হয়।
◽লিভাৰক বিষমুক্ত কৰাত ফলপ্ৰসূ
যকৃত আমাৰ শৰীৰৰ এক গুৰুত্বপূৰ্ণ অংগ, বিষাক্ত পদাৰ্থ আঁতৰোৱাৰ বাবেও যকৃতে কাম কৰে । বিটত থকা এন্টিঅক্সিডেন্ট বিটালেনে যকৃতক বিষমুক্ত কৰাত সহায় কৰে। ইয়াৰ ফলত যকৃতৰ কাৰ্য্যক্ষমতা উন্নত হয় আৰু চৰ্বিযুক্ত যকৃতৰ সম্ভাৱনা হ্ৰাস পাব পাৰে। যিসকলে অস্বাস্থ্যকৰ খাদ্য, মদ্যপান বা অত্যধিক পৰিমাণৰ ভজা খাদ্য সেৱন কৰে, তেওঁলোকৰ বাবে বিট যকৃতৰ স্বাস্থ্যক সহায় কৰা ছুপাৰফুড বুলি প্ৰমাণিত ।
◽আন্ত্ৰিক স্বাস্থ্য আৰু হজম শক্তিৰ বাবে উপকাৰী
বিটত প্ৰচুৰ পৰিমাণে আঁহ থাকে, যিয়ে পাচনতন্ত্ৰ শক্তিশালী কৰাত সহায় কৰে। আঁহে কোষ্ঠকাঠিন্য দূৰ কৰে আৰু অন্ত্ৰ পৰিষ্কাৰ কৰি ৰখাত সহায় কৰে। নিয়মিতভাৱে বিট খোৱাৰ ফলত আন্ত্ৰিক স্বাস্থ্য উন্নত হয় আৰু পেটৰ লগত জড়িত সমস্যা যেনে গেছ, বদহজম, এচিডিটিৰ পৰাও সকাহ দিব পাৰি। সুস্থ পাচনতন্ত্ৰই ৰোগ প্ৰতিৰোধ ক্ষমতা আৰু শক্তিৰ মাত্ৰাত প্ৰত্যক্ষ প্ৰভাৱ পেলায়।
◽ইমিউনিটি আৰু শক্তিৰ মাত্ৰা বৃদ্ধি কৰাত সহায় কৰে
বিটত ভিটামিন চি, জিংক, আৰু অন্যান্য এন্টিঅক্সিডেন্ট থাকে, যিয়ে ৰোগ প্ৰতিৰোধ ক্ষমতা শক্তিশালী কৰে। ইয়াৰ ফলত শৰীৰে সংক্ৰমণৰ বিৰুদ্ধে যুঁজিবলৈ শক্তি লাভ কৰে। তদুপৰি বিটে শক্তিৰ মাত্ৰা বৃদ্ধিতো সহায় কৰে। এই কাৰণেই খেলুৱৈ আৰু ব্যায়ামকাৰীসকলে বিটৰ ৰস খাব লাগে, কিয়নো ই ষ্টেমিনা আৰু প্ৰদৰ্শন উন্নত কৰে।
◽কেনেকৈ বিট খাব লাগে?
আপোনাৰ খাদ্যত বিট বহু ধৰণে অন্তৰ্ভুক্ত কৰিব পাৰে। ইয়াক কেঁচাকৈ চালাড হিচাপে, সিজোৱাই, পাচলি হিচাপে সিজাই বা ৰস হিচাপে খাব পাৰি। ৰাতিপুৱা খালী পেটত বিটৰ ৰস খোৱাটো আটাইতকৈ উপকাৰী বুলি গণ্য কৰা হয় যদিও সীমিত পৰিমাণে সেৱন কৰিব লাগে।
◽বিটত পোৱা পুষ্টিকৰ উপাদান :
(১) ভিটামিন:
• ভিটামিন চি – ৰোগ প্ৰতিৰোধ ক্ষমতা বৃদ্ধি আৰু সুস্থ ছাল বজাই ৰখাত সহায় কৰে।
• ভিটামিন বি ৬ – মগজুৰ কাৰ্য্যক্ষমতা আৰু বিপাকীয় ক্ৰিয়াৰ বাবে অপৰিহাৰ্য।
• ফ’লেট (ভিটামিন বি ৯) – তেজ গঠন আৰু গৰ্ভাৱস্থাৰ বাবে অপৰিহাৰ্য।
(২) খনিজ পদাৰ্থ:
• আইৰণ – হিম’গ্লবিন বৃদ্ধি কৰাত সহায় কৰে আৰু ৰক্তহীনতা প্ৰতিৰোধ কৰে।
• পটাছিয়াম – ৰক্তচাপ নিয়ন্ত্ৰণ আৰু হৃদৰোগ স্বাস্থ্যৰ বাবে অপৰিহাৰ্য।
• মেগনেছিয়াম – পেশী আৰু স্নায়ুৰ কাৰ্য্যৰ বাবে উপকাৰী।
• ফচফৰাছ – হাড় আৰু দাঁত শক্তিশালী কৰে।
• তাম – আইৰণ শোষণ আৰু ৰোগ প্ৰতিৰোধ ক্ষমতাৰ বাবে অপৰিহাৰ্য।
(৩) আঁহ:
হজম শক্তি উন্নত কৰে। কোষ্ঠকাঠিন্য আৰু আন্ত্ৰিক সমস্যাৰ পৰা উপশম দিয়ে।
(৪) এন্টিঅক্সিডেন্ট:
• Betalains – শৰীৰৰ পৰা বিষাক্ত পদাৰ্থ আঁতৰোৱাত সহায় কৰে। কোষক ফ্ৰী ৰেডিকেলৰ পৰা ৰক্ষা কৰে।
(৫) প্ৰাকৃতিক নাইট্ৰেট:
ৰক্ত সঞ্চালন উন্নত কৰাত সহায় কৰে। ৰক্তচাপ কমোৱাত সহায় কৰে।
(৬) কাৰ্বহাইড্ৰেট : শৰীৰক শক্তি প্ৰদান কৰে।
(৭) প্ৰটিন (কম পৰিমাণে আছে ) : পেশী আৰু কলা মেৰামতি কৰাত সহায় কৰে।
(৮) পানীৰ পৰিমাণ: ইয়াত থকা পানীয়ে শৰীৰত পানীৰ অভাৱ হ'বলৈ নিদিয়ে।
বিট কম কেলৰিযুক্ত অথচ অধিক পুষ্টিকৰ খাদ্য। ইয়াত থকা ভিটামিন, খনিজ পদাৰ্থ, আঁহ আৰু এন্টিঅক্সিডেন্টে হৃদযন্ত্ৰ, মগজু, যকৃত, আৰু পাচনতন্ত্ৰক শক্তিশালী কৰে। দৈনিক সঠিক পৰিমাণত বিট সেৱন কৰিলে স্বাস্থ্যৰ বহু উপকাৰ পোৱা যায়।
