🔴 সঘনাই হোৱা মূৰৰ বিষ, বমি আৰু শাৰীৰিক দুৰ্বলতা? এইয়া ব্ৰেইন টিউমাৰৰ লক্ষণ হ'ব পাৰে!
( অপূৰ্ব দাস )
টিউমাৰ বা কৰ্কট ৰোগৰ নাম শুনিলেই সাধাৰণতে মানুহৰ মনত এক অনামী ভয় আৰু শংকাৰ সৃষ্টি হয়। আৰু যেতিয়া এই টিউমাৰ আমাৰ শৰীৰৰ আটাইতকৈ গুৰুত্বপূৰ্ণ অংগ মগজুত হোৱাৰ কথা আহে, তেতিয়া চিন্তা আৰু ভয় দুগুণে বৃদ্ধি পোৱাটো অতি স্বাভাৱিক। সাম্প্ৰতিক সময়ৰ চিকিৎসা বিজ্ঞানৰ পৰিসংখ্যাই আঙুলিয়াই দিছে যে যোৱা কেইটামান দশকত সমগ্ৰ ভাৰতবৰ্ষত ব্ৰেইন টিউমাৰ বা মগজুৰ টিউমাৰত আক্ৰান্তৰ সংখ্যা অস্বাভাৱিকভাৱে আৰু অতি দ্ৰুতগতিত বৃদ্ধি পাইছে। প্ৰতি বছৰে ভাৰতত প্ৰায় ৪০,০০০ ৰো অধিক লোকৰ দেহত নতুনকৈ ব্ৰেইন টিউমাৰ ধৰা পৰে আৰু ইয়াৰে প্ৰায় ২৫,০০০ আক্ৰান্তই অকাল মৃত্যুক সাবটি ল'ব লগা হয়। পৰিসংখ্যা অনুসৰি ব্ৰেইন টিউমাৰ হৈছে আমাৰ দেশৰ চতুৰ্দশ সৰ্বাধিক সাধাৰণ কৰ্কট ৰোগ আৰু কৰ্কট ৰোগৰ ফলত হোৱা মৃত্যুৰ কাৰণসমূহৰ ভিতৰত ই একাদশ স্থানত আছে। আটাইতকৈ চিন্তনীয় কথাটো হ'ল যে বৰ্তমান সময়ত কেৱল বয়সস্থ লোকেই নহয়, বৰঞ্চ কম বয়সীয়া যুৱক-যুৱতী আৰু শিশুসকলৰ মাজতো এই গুৰুতৰ সমস্যাটো দ্ৰুতগতিত বৃদ্ধি পোৱা পৰিলক্ষিত হৈছে।
🔴 মগজুৰ কাৰ্যপ্ৰণালী আৰু ব্ৰেইন টিউমাৰ আচলতে কি?
মানৱ দেহত মগজুক আটাইতকৈ গুৰুত্বপূৰ্ণ, স্পৰ্শকাতৰ আৰু জটিল অংগ বুলি গণ্য কৰা হয়। মগজুৱে কেৱল আমাৰ চিন্তা-ভাৱনা কৰা বা স্মৃতিশক্তি ধৰি ৰখাৰ কামেই নকৰে, বৰঞ্চ উশাহ-নিশাহ লোৱাৰ পৰা আৰম্ভ কৰি শৰীৰৰ সকলো দৈনন্দিন কাৰ্যকলাপ নিৰৱচ্ছিন্নভাৱে নিয়ন্ত্ৰণ কৰে। যেতিয়া এই অতি গুৰুত্বপূৰ্ণ মগজুত থকা কোষবোৰৰ অস্বাভাৱিক বা অনিয়ন্ত্ৰিতভাৱে বৃদ্ধি হ'বলৈ ধৰে আৰু ই একোটা টেমুনাৰ সৃষ্টি কৰে, তেতিয়াই তাক চিকিৎসা বিজ্ঞানৰ ভাষাত ব্ৰেইন টিউমাৰ বুলি কোৱা হয়।
চিকিৎসক আৰু বিশেষজ্ঞসকলৰ মতে, সকলো ব্ৰেইন টিউমাৰেই কেন্সাৰ বা কৰ্কট ৰোগ নহয়। যদি সঠিক সময়ত আৰু প্ৰাৰম্ভিক অৱস্থাতেই টিউমাৰটো ধৰা পৰে, তেন্তে আধুনিক চিকিৎসাৰ সহায়ত ইয়াৰ নিৰাময় আৰু ৰোগীজন সম্পূৰ্ণৰূপে সুস্থ হৈ উঠাৰ সম্ভাৱনা বহুগুণে বৃদ্ধি পায়। সেইবাবেই সমাজৰ প্ৰতিগৰাকী ব্যক্তিয়েই ব্ৰেইন টিউমাৰৰ প্ৰাথমিক লক্ষণসমূহৰ বিষয়ে সঠিক জ্ঞান আৰু সজাগতা থকাটো অতি প্ৰয়োজনীয়।
🔴 ব্ৰেইন টিউমাৰৰ ভয়াৱহতা আৰু সজাগতা
মানুহৰ মাজত এই ৰোগবিধৰ বিষয়ে সজাগতা বৃদ্ধি কৰা, ৰোগটোৰ প্ৰাৰম্ভিক লক্ষণসমূহ সোনকালে চিনাক্ত কৰাৰ উপায়সমূহৰ বিষয়ে শিক্ষিত কৰা আৰু ব্ৰেইন টিউমাৰত আক্ৰান্ত ৰোগীসকলক মানসিক শক্তি আৰু সাহস প্ৰদান কৰাৰ মূল উদ্দেশ্যৰে প্ৰতি বছৰে ৮ জুন তাৰিখটো 'বিশ্ব ব্ৰেইন টিউমাৰ দিৱস' হিচাপে পালন কৰা হয়।
শেহতীয়া চিকিৎসা প্ৰতিবেদনৰ পৰা জনা গৈছে যে আধুনিক যুগৰ অস্বাভাৱিক জীৱনশৈলী, অত্যাধিক মানসিক চাপ, পৰ্যাপ্ত নিদ্ৰাৰ অভাৱ আৰু দ্ৰুতগতিত বৃদ্ধি পোৱা পাৰিপাৰ্শ্বিক প্ৰদূষণে কম বয়সীয়া লোকসকলৰ মাজতো ব্ৰেইন টিউমাৰৰ বিপদাশংকা বৃদ্ধি কৰিছে। ইয়াৰ উপৰিও কিছুমান নিৰ্দিষ্ট ক্ষেত্ৰত এই ৰোগ জিনীয় বা বংশগত কাৰণৰ সৈতেও জড়িত থাকিব পাৰে। অৰ্থাৎ যদি পৰিয়ালৰ কোনো পূৰ্বপুৰুষৰ আগতে এই ৰোগৰ ইতিহাস থাকে, তেন্তে পৰৱৰ্তী প্ৰজন্মৰ বাবে ইয়াৰ বিপদাশংকা যথেষ্ট বৃদ্ধি পায়।
এই ৰোগৰ আটাইতকৈ ডাঙৰ প্ৰত্যাহ্বানটো হৈছে ইয়াৰ প্ৰাথমিক লক্ষণসমূহ। ব্ৰেইন টিউমাৰৰ লক্ষণসমূহ প্ৰায়ে সাধাৰণ মূৰৰ বিষ, ভাগৰ লগা বা মানসিক চাপৰ ফলত হোৱা সাধাৰণ সমস্যাৰ সৈতে প্ৰায় একে ধৰণৰ হয়, যাক মানুহে সাধাৰণ ৰোগ বুলি ভাবি আওকাণ কৰে। কিন্তু এনেদৰে কৰা সৰু ভুল এটাই পৰৱৰ্তী সময়ত মানুহৰ জীৱনলৈ এক ভয়ংকৰ বিপদ কঢ়িয়াই আনিব পাৰে।
🔴 সময়মতে ব্ৰেইন টিউমাৰৰ চিনাক্তকৰণ কেনেকৈ কৰিব পাৰি?
তলত ব্ৰেইন টিউমাৰৰ কিছুমান গুৰুত্বপূৰ্ণ লক্ষণৰ বিষয়ে আলোচনা কৰা হ'ল:
◽ সঘনাই আৰু অবিৰতভাৱে হৈ থকা মূৰৰ বিষ: ব্ৰেইন টিউমাৰৰ আটাইতকৈ সাধাৰণ আৰু প্ৰাথমিক সংকেতটোৱেই হৈছে অবিৰতভাৱে হৈ থকা মূৰৰ বিষ। এই বিষ সাধাৰণ মূৰৰ বিষতকৈ সম্পূৰ্ণ বেলেগ ধৰণৰ হয় আৰু সময় পাৰ হোৱাৰ লগে লগে ইয়াৰ তীব্ৰতা ক্ৰমান্বয়ে বৃদ্ধি পাবলৈ ধৰে। বিশেষকৈ ৰাতিপুৱা শুই উঠাৰ সময়ত এই বিষ অত্যাধিক তীব্ৰ হোৱা অনুভৱ হয়। বহুত ৰোগীৰ ক্ষেত্ৰত কাহ মাৰিলে, তললৈ হালিলে বা শৰীৰত কোনো ধৰণৰ অতিৰিক্ত চাপ প্ৰয়োগ কৰিলে এই মূৰৰ বিষৰ মাত্ৰা ভয়ংকৰভাৱে বাঢ়ি যোৱা দেখা যায়। অৱশ্যে প্ৰতিটো মূৰৰ বিষেই ব্ৰেইন টিউমাৰৰ সংকেত নহয়, কিন্তু যদি মূৰৰ বিষ একেৰাহে হৈ থাকে আৰু সাধাৰণ ঔষধ খালে উপশম পোৱা নাযায়, তেন্তে ইয়াক কেতিয়াও আওকাণ কৰিব নালাগে।
◽ মূৰৰ বিষৰ লগতে চকুৰ দৃষ্টিশক্তিৰ সমস্যা: কেৱল মূৰৰ বিষেই নহয়, ব্ৰেইন টিউমাৰৰ প্ৰভাৱ ৰোগীৰ চকু আৰু দৃষ্টিশক্তিৰ ওপৰতো পৰে। ব্ৰেইন টিউমাৰে মগজুৰ সেই বিশেষ অংশবোৰত হেঁচা প্ৰয়োগ কৰে যিবোৰে আমাৰ চকুৰ দৃষ্টি নিয়ন্ত্ৰণ কৰে। ইয়াৰ ফলত ৰোগীয়ে চকুৰে ধোঁৱা-কোঁৱা বা অস্পষ্ট দেখা পাব পাৰে। লগতে এটা বস্তুকে দুটাকৈ দেখা পোৱা বা ডাবল ভিজনৰ দৰে সমস্যাৰ সৃষ্টি হ'ব পাৰে। কিছুমান অৱস্থাত টিউমাৰটোৱে আমাৰ অপটিক নাৰ্ভ বা দৰ্শন স্নায়ুৰ ওপৰতো প্ৰত্যক্ষভাৱে বিৰূপ প্ৰভাৱ পেলাব পাৰে, যাৰ ফলত চকুৰ দৃষ্টি ক্ষমতা হ্ৰাস পায়। যদি দৃষ্টিশক্তিত অহা এনে পৰিৱৰ্তন হঠাতে হয় বা একেৰাহে বহুত দিন চলি থাকে, তেন্তে এয়া এক গুৰুতৰ সতৰ্কবাণী হ'ব পাৰে।
◽ সঘনাই বমি ভাব আৰু বমি হোৱাৰ সমস্যা: কোনো স্পষ্ট কাৰণ নোহোৱাকৈ বাৰে বাৰে বমি ভাব অনুভৱ হোৱা বা বমি হোৱাটোও ব্ৰেইন টিউমাৰৰ এক অতি গুৰুত্বপূৰ্ণ লক্ষণ হ'ব পাৰে। যেতিয়া মগজুৰ ভিতৰত টিউমাৰৰ আকাৰ বৃদ্ধি পায়, তেতিয়া ইয়াৰ ভিতৰৰ চাপো বৃদ্ধি পায় আৰু এই বৰ্ধিত চাপে শৰীৰৰ বমি নিয়ন্ত্ৰণ কৰা কেন্দ্ৰটোক বেয়াকৈ প্ৰভাৱিত কৰে। এই সমস্যাটো সাধাৰণ ফুড পইজনিং বা গেছৰ ফলত হোৱা পেটৰ সমস্যাতকৈ সম্পূৰ্ণ বেলেগ হয়, কাৰণ ইয়াত হজম সম্পৰ্কীয় কোনো স্পষ্ট কাৰণ বিচাৰি পোৱা নাযায়। যদি ৰাতিপুৱা শুই উঠাৰ পিছত সঘনাই বমি হয় আৰু তাৰ লগে লগে মূৰৰ বিষ বা চক্ৰ ঘূৰোৱা সমস্যাও থাকে, তেন্তে এয়া নিশ্চিতভাৱে স্নায়বিক সমস্যা বা টিউমাৰৰ ফালে দিয়া এক ডাঙৰ সংকেত।
◽ শৰীৰৰ কোনো অংশ দুৰ্বল বা অসাৰ হৈ পৰা: ব্ৰেইন টিউমাৰৰ কাৰণে শৰীৰৰ কোনো এক বিশেষ অংশত, যেনে হাত বা ভৰিত দুৰ্বলতা অনুভৱ হোৱা, হঠাতে অসাৰ বা সুন্ন হৈ পৰা, অথবা খোজ কাঢ়োঁতে ভাৰসাম্য হেৰুৱাই পেলোৱাৰ দৰে গুৰুতৰ সমস্যা দেখা দিব পাৰে। যিহেতু আমাৰ মগজুৱে আমাৰ শৰীৰৰ প্ৰতিটো সৰু-বৰ গতিবিধি আৰু কাৰ্যকলাপ নিয়ন্ত্ৰণ কৰে, সেয়েহে যদি টিউমাৰটোৱে মগজুৰ মটৰ কণ্ট্ৰল বা গতিবিধি নিয়ন্ত্ৰণ কৰা অংশত হেঁচা দিয়ে, তেতিয়া ৰোগীয়ে হাত বা ভৰি লৰচৰ কৰিবলৈ অসুবিধা পায়। ইয়াৰ ফলত খোজ কাঢ়োঁতে খোৰোচা মৰা বা নিজৰ শৰীৰৰ ভাৰসাম্য ৰক্ষা কৰিব নোৱাৰা অৱস্থাৰ সৃষ্টি হয়। এই গুৰুতৰ লক্ষণসমূহ ব্ৰেইন ষ্ট্ৰোকৰ ক্ষেত্ৰতো দেখা যায়, সেয়েহে এনে অৱস্থাক জৰুৰীকালীন মেডিকেল সমস্যা হিচাপে গণ্য কৰি পলম নকৰাকৈ লগে লগে চিকিৎসকৰ পৰামৰ্শ লোৱাটো অতিশয় জৰুৰী।
